ALBERTO SUÁREZ
Luis Núñez y Los Folganzanes anden presentando discu nuevu con diez cantares n’asturianu. Col nome de Blinca, el tercer discu de la banda enseña lo que ye altura y calidá na composición y interpretación de les pieces. Una grabación con melodíes de Núñez llenes de ritmu, equilibriu y fuercia pa vistir unes lletres que, munches veces, falen del éxitu que ye saber echar los fracasos pa la espalda y tirar p’alantre. Blinca nun ye un discu triste, ye como un solón d’abril fuerte y repentín que calienta y mete lluz depués del iviernu. Los autores de les lletres son Susana Sela, Inaciu Galán, Dani García y tamién Luis.
Nesti trabayu destaquen pieces de mucha calidá, como «Tengo un sitiu pa ti», un cantar particular y pegadizu onde peguen mui fuerte les guitarres y qu’escoyeron pa representar al asturianu na edición del 2020 del Festival Liet de les llingües minoritaries europees que se diba facer na ciudá danesa de Aabenraa, pero que la pandemia de covid-19 dexó nel aire, como cualquier conciertu que nun sía on-line. Otru cantar especial d’esti discu nuevu de Los Folganzanes ye «Trátame bien».
Luis Núñez fuera guitarreru y cantante del grupu Fuera de Serie. Nel añu 2013 entama una banda pa tocar con él, Los Folgazanes, y empiecen a movese ente los sones pop, rock y folk. Colos años llegaron los trabayos discográficos, El cantar del folganzán (2014) y Xuro non Tornar (2016). A la vera de Luis siempre hai músicos y voces de muncha categoría, como Xuacu Amieva y Ángel Ruiz, Ramón Blanco o Mariluz Cristóbal Caunedo. Los Folganzanes d’esti discu son Dani García (arpa, violín y voz), Fabián Fernández (gaita y flautes), Alfredo Trelles (batería), Marcos Díaz (baxu y voz) y Armando Fernández (teclaos). A ellos amestáronse les collaboraciones del pianista Edgar Vero y de los guitarristes Willy Bigbrown y Julio Gilsanz, o la voz de la gran cantante de tonada Mariluz Cristóbal Caunedo.
La producción de Blinca, un discu rockeru y poperu con momentazos folk (como la instrumental «La fuente la fisgona»), ye del propiu Núñez pal sellu Gato en La, y editóse cola ayuda de la Conseyería de Cultura, Política Llingüística y Turismu del Principáu d’Asturies. La producción executiva ye de Patricia Moro y el gran trabayu de masterización ye de Boby García.
Luis Núñez tien munchu méritu al sacar esti discu –cola que ta cayendo nel sector cultural y musical–, en medio d’una pandemia. Pero él ye un músicu que nun ye a parar, un talentu creativu que tira del asturianu pa ponelu en sitiu que merez: no cimero. El trabayu ta a la venta en cedé o n’archivos pa descargar on-line nes plataformes de venta principales y na web del grupu.
Nel terrén de los reconocimientos, Luís Nuñez y Los Folganzanes llevaron el Premiu al Meyor Cantar na edición del 2017 col tema «La ñeve y la esmeralda».
Leave a Reply