Los desafíos tecnolóxicos, tema del Día de les Ciencies Asturianes

Dia de les Ciencies Asturianes

La Conseyería d’Educación y Cultura celebra la séptima edición del Día de les Ciencies Asturianes con dos actividaes divulgatives. Na primera, el científicu Amador Menéndez va presentar la ponencia «Desafíos tecnolóxicos de la nuestra era» y na segunda, Víctor Suárez Piñero va esplicar a los escolinos del CP El Vallín y l’IES Isla de la Deva, de Piedras Blancas (Castrillón) en qué consiste y cómo se desenvueve’l proyectu de la enciclopedia llibre Wikipedia.

El primer actu va facese’l xueves 9 de payares, a les 19:30 hores, nel Real Institutu d’Estudios Asturianos (Ridea), nel númberu 9 de la Plaza de Porlier (Uviéu). Na conferencia, el ponente, Amador Menéndez (Les Regueres, 1969), va plantear les posibilidaes qu’ufre la tecnoloxía a la hora d’encarar dellos de los retos más importantes de la humanidá. Menéndez, doctor en Química pola Universidá d’Uviéu, trabaya actualmente nel Institutu Tecnolóxicu de Materiales d’Asturies (ITMA) y, enantes, tuvo nel Conseyu Superior d’Investigaciones Científiques, el Llaboratoriu Européu de Radicación de Sincrotón, el Centru d’Investigación en Nanomateriales y Nanotecnoloxía (CINN) y l’Institutu Tecnolóxicu de Massachusetts (MIT), onde, xunto con otros cinco profesionales, asentó’l récord mundial d’eficiencia na captura d’enerxía solar. Tamién tuvo dellos reconocimientos pol so trabayu, como’l Premiu Européu de Divulgación Científica (2013) o’l Premiu Xovellanos d’Ensayu 2017 pol llibru Historias del futuro. La era del homo tecnológicus.

El vienres 10 de payares van ser los escolinos de la Escuela Pública El Vallín y del IES Isla de la Deva, de Piedras Blancas (Castrillón), los que van participar nuna charla divulgativa que va tar al cargu de Víctor Suárez Piñero, alministrador y divulgador del proyectu Wikipedia n’Asturies. Col títulu «Wikipedia: un universu d’oportunidaes», va presentar esta iniciativa, que cuenta yá con más de 53.000 artículos escritos n’asturianu. Suárez Piñero va esplicar, ente otres cóses, como l’usu y la creación nel aula de conteníos baxo llicencia libre –como son los que s’inclúin en Wikipedia– lleva implícitu’l fomentu d’una ciudadanía comprometío colos sos derechos y deberes.

El Día de les Ciencies Asturianes coincide con la celebración, esti mes, del Día Mundial de la Ciencia pa la Paz y el Desarrollu. Esta conmemoración ofrez la posibilidá de tresmitir la importancia de la ciencia na vida diaria y alimentar el debate sobre les cuestiones científiques. El lema d’esti añu, «Una ciencia pal entendimientu mundial», pretende amosar la importancia que tien la investigación científica pa la paz y el desenvolvimientu sostenible.

Be the first to comment

Leave a Reply

Tu dirección de correo no será publicada.


*