Al Berto —seudónimu d’Alberto Raposo Pidwell Tavares— nació en Coímbra en 1948 pero crióse na ciudá marinera de Sines, nel litoral alentexanu. De mozu marchó a Lisboa a facer estudios artísticos y, en 1967, escapó a Bélxica al declarase insumisu militar. Esti devenir vital, esti andar d’un llau pa otru, va espeyase en tola so escritura, sobre manera na que ta considerada la so obra cimera: O Medo (El mieu). La primer edición d’esti llibru salió en 1987 col subtítulu Trabalho Poético 1974-1986 (Trabayu Poéticu 1974-1986), anque les ediciones posteriores (tamién les que se fixeron depués de la muerte del poeta, en 1997) foron axuntando creaciones nueves al corpus inicial. Ye, por esti motivu, una biblia strictu sensu, un llibru de llibros, onde se mesturen xéneros (poesía, diariu, prosa poética, teatru…), tonos y hasta idiomes, nuna especie d’obra total, heteroxénea y, al mesmu tiempu, provista de la unidá que namás pue ufiertar una vida, anque sía una vida tan frañada, tan discontinua, como la d’Al Berto.
Leave a Reply