La obra Un vasu d’agua, de la escritora sierense Ángeles Carbajal, ameritó anguaño’l Premiu Xuan María Acebal de Poesía n’asturianu, que convoca la Conseyería d’Educación y Cultura. El xuráu, que garró la decisión por unanimidá, destacó nel acta del fallu «el tonu unitariu, intensu y coherente de la voz poética», col que Carbajal consigue «emocionar al llector a lo llargo de la obra».
El xuráu encargáu de valorar les ocho obres finalistes presidiólu’l director xeneral de Planificación Llingüística y Normalización, Fernando Padilla Palicio, y integráronlu los escritores Lourdes Álvarez García, Antón García Fernández, Héctor Pérez Iglesias, Xuan Santori Vázquez y Solinca Turbón Cuesta. Esti premiu ta dotáu con 3.000 euros.
Al Xuan María Acebal podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.
Ángeles Carbajal Roza, (Argüeyes, Siero, 1959) ye llicenciada n’Historia del Arte pola Universidá d’Uviéu y collaboradora de les revistes Clarín, Lliteratura, Reloj de Arena o Anáfora, ente más otres. Ye autora tamién de los poemarios en castellanu La caligrafía de la distancia (1993) y La sombra de otros días (2002), y de los poemarios n’asturianu En campu abiertu (col qu’algamó nel 2012 el Premiu «Teodoro Cuesta» de Poesía) y L’aire ente la rama (que mereció, nel 2014, el Premiu Xuan María Acebal, amás del Premiu al meyor llibru del añu n’asturianu qu’otorga la Tertulia Malory).
Leave a Reply