Arstusia: fotografía anagramática o permutaciones d’ocho elementos

Joan Fontcuberta nel videu de presentación de la esposición 'Arstusia', Muséu de Belles Artes, Uviéu.
Joan Fontcuberta nel videu de presentación de la esposición 'Arstusia', Muséu de Belles Artes, Uviéu.

ENRIQUE GARCÍA RODRÍGUEZ
En matemátiques, una permutación ye la variación del orde o de la disposición de los elementos d’un conxuntu ordenáu, esto ye, si tenemos el conxuntu {1 2 3}, una permutación d’él sería’l conxuntu {3 1 2}. Nel terrén de les lletres, l’equivalente sería l’anagrama, que ye una palabra o fras que resulta de la tresposición de lletres d’otra palabra o fras, por exemplu, el clásicu AMOR/ROMA. Basáu nestos principios, el fotógrafu Joan Fontcuberta (Barcelona, 1955) recorrió’l territoriu asturianu non solo buscando, sinón tamién creando, permutaciones d’esi mesmu territoriu que tienen como significantes los anagrames de la palabra «Asturias». El resultáu pue vese hasta’l 28 d’agostu nel Muséu de Belles Artes d’Asturies, na esposición Arstusia.

Fotografíes que se recoyeron nel llibru d'artista 'Trauma', de Joan Fontcuberta.
Fotografíes que se recoyeron nel llibru d’artista ‘Trauma’, de Joan Fontcuberta.

La muestra preséntase en tres espacios bien diferenciaos: nel atriu de la planta -1 del edificiu de l’Ampliación puen vese les imáxenes que formen el llibru d’artista Trauma, onde se recueyen fotografíes que Fontcuberta recuperó de delles fototeques asturianes y que tienen en común el so estáu «traumáticu», quier dicise, sometíu a los estragos del tiempu, de los elementos y de l’acción humana; pásase depués a una sala onde’l propiu artista catalán esplica, nun videu, el planteamientu del proyectu y el cómo de la so materialización nes imáxenes que se ven nel espaciu principal de la muestra, dispuestu a la manera de galeríes escures y cuasi llaberíntiques onde la única claridá ye la que sal de les caxes lluminoses qu’agospien les sesenta fotografíes.

Estes instantánees presenten, colos elementos del paisaxe real —físicu y simbólicu—, una Asturies permutada, una Asturies anagramática. Asina, el depósitu d’agua de Roces, en Xixón, conviértese, a los güeyos del espectador, nes naves d’un edificiu que paez más templu que delles ilesies presentes na muestra, como la catedral d’Uviéu o la colexata de Cuadonga. Coles mesmes pieces, Fontcuberta trestoca los significaos, como asocede, por exemplu, colos tubos del órganu de la basílica de Cuadonga, que, de nun ser pola información de la cartela, podía asitiase ensin problema en cualquiera de les instalaciones industriales que se ven alrededor, como la Fábrica Muséu de la Sidra de Trabanco, en Llavandera, o l’alliviaderu d’El Natahoyo, en Xixón.

Otra de les ferramientes de les que se manda’l fotógrafu catalán nos sos xuegos d’estrañamientu ye’l tratamientu de lo natural como si se tratara d’una reconstrucción y de lo que fixo’l ser humanu como productu de la naturaleza. Esto pasa, por exemplu, coles maquetes del Muséu de Ferrocarril o del Grupu Asturianu de Módulos Ferroviarios de Xixón y, sobre manera, coles imáxenes del entornu del Muséu del Xurásicu d’Asturies, en Colunga, onde dota a les reproducciones de dinosaurios d’un aspectu que, si nun fuera pola imposibilidá racional de que sían reales, l’espectador creería que Fontcuberta viaxó a la dómina cuando los saurópodos andaben pela playa de La Griega. Sicasí, esto nun ye dalgo ayeno a la historia recién d’Asturies, onde se gastó más en construir lo falso qu’en mirar pol patrimoniu verdaderu.

Delles imáxenes pertenecen tamién a lo que Pessoa llamaba «el mundu del suañu», espacios que nacen de lo tanxible pa tresformase n’otra realidá presente namás que nel interior del que la percibe. ¿Qué ye, si non, la semeya del Puertu d’El Musel o los escenarios imposibles, como d’un mundu estraterrenu, que se creen nel Acuariu de Xixón? ¿Ye que nun vamos poder dicir, col narrador del cuentu «La perda del yate Nada» al ver los cuadros del camarote del capitán Ayakwamm, qu’esta colección figura «tolos suaños que la humanidá tuvo de tierres remotes, de paisaxes perfectos, de países imposibles»? La respuesta atopámosla, en parte, nes palabres del propiu Fontcuberta, cuando diz que, nesti trabayu, nun se mandó d’una «voluntá descriptiva», sinón de la «oposición ente lo evidente y lo vedao, ente lo tanxible y lo ilusorio», de manera tala que pudiera «siguir alimentando la obsesión vieya de caleyar per eses tierres de naide ente la realidá y la ficción».

Dellos anagrames de la palabra «Asturias», que faen de significante pa caúna de les imáxenes de la esposición.
Dellos anagrames de la palabra «Asturias», que faen de títulu (significante) pa caúna de les imáxenes de la esposición.

Joan Fontcuberta, artista, docente, ensayista, críticu, promotor de arte y ganador de premios como los nacionales Fotografía y Ensayu o’l de la fundación sueca Hasselblad, ye’l cuartu fotógrafu que participa na iniciativa «Miradas de Asturias (Miraes d’Asturies)», de la Fundación Cristina Masaveu Peterson. Esti proyectu de mecenazgu, onde s’enmarca la esposición Arstusia, busca promover la creación d’un fondu d’obra inédito inspirao n’Asturies a partir de la visión personal de los fotógrafos invitaos, ente los que yá tán, amás del Fontcuberta, los tamién premios nacionales de Fotografía Alberto García-Alix, José Manuel Ballester y Ouka Leele.

Be the first to comment

Leave a Reply

Tu dirección de correo no será publicada.


*