Dellos coros d’Asturies xúntense pa sacar fondos pa escavar la villa romana d’Andayón, en Les Regueres

Detalle del mosaicu que s’alcontró na villa d’Andayón o de San Martín. Abril del 2018.
Detalle del mosaicu que s’alcontró na villa d’Andayón o de San Martín. Abril del 2018.

El sábadu 15 de xunu, a les 20:30 hores, va celebrase na ilesia de San Domingo de Guzmán, n’Uviéu, un conciertu benéficu en favor del proyectu de les escavaciones arqueolóxiques na villa romana d’Andayón (o de San Martín), en La Estaca, conceyu de Les Regueres. El recital va dalu’l coru MOSAICORUM, una formación de creación recién compuesta por voces de dellos coros d’asturies que s’ofrecieron de manera desinteresada a collaborar cola Asociación Amigos de La Villa Romana de San Martín de La Estaca, que ye la entidá qu’organiza l’actu.

El programa del conciertu va incluir composiciones tanto de música sacra como popular y tien como oxetivu llamar l’atención sobre les demandes culturales de la sociedá, amás de consiguir dineru pa llevar alantre la escavación de la villa d’Andayón. Nesti sitiu del conceyu de Les Regueres, l’equipu del arqueólogu Juan Muñiz atopó hai dalgo más d’un añu un mosaicu romanu d’una calidá escepcional pero tuvieron que lu volver tapar porque aquella escavación nun tenía la dotación económica necesaria pa poder siguir.

L’accesu al conciertu va ser llibre hasta que se complete l’aforu y nel esterior van colocase urnes onde los asistentes van poder facer la so aportación económica, que ye totalmente voluntaria y que va dir destinada esclusivamente a la escavación del mosaicu romanu de La Estaca.

Be the first to comment

Leave a Reply

Tu dirección de correo no será publicada.


*