Fai como l’agua, amigu, déxalo tar

Alfredo González.
Alfredo González.

Afluentes ye’l discu col que vuelve’l cantautor Alfredo González a les repises y a les plataformas dixitales. Depués de cuatro años de silenciu discográficu, el de Turón ta d’estrena d’una colección d’once cantares publicaos pola multinacional Warner Music. Producíos por Pachi García Alis nos estudios de Baeza (Xaén), estos once cortes muestren al Alfredo más eclécticu y personal, ensin etiquetes nin dependencies a xeraquíes nin a races de música. Del calter mediterraneu de la propia «Afluentes» al aire alternativu de «Pentotal» (la única que ta compuesta y grabada n’asturianu d’esti discu); de la honestidá sensible de «Guardad las tijeras» al minimalismu escépticu d’«El pozo». Once canciones pa escapar corriendo o atechase detrás de la ventana. Once afluentes que van tranquilos pal mar que tea más cerca.

Alfredo González (Turón, 1981) subió pela primer vez a un escenariu nel añu 2001, nel café La Pista, de Mieres, p’abrir un conciertu de Pablo Mónico. Les canciones que cantó llamaron l’atención del técnicu de soníu del conciertu, Marco Castañón, que, col tiempu, resultó ser el sofitu pal primer discu d’Alfredo La vida de alquiler, que diba editase nel añu 2004.

En mayu del 2008, Alfredo firma’l primer contratu discográicu y publica un trabayu a nivel estatal: Dudas y Precipicios, con DFX Discos Especiales. Al poco llega a un alcuerdo con Discos L’Aguañaz pa editar la primer referencia d’él en llingua asturiana, La nada y tu. Con esos dos trabayos llevó cuatro premios de la música asturiana (Premiu AMAS al Meyor Lletrista, Meyor Teclista, Meyor Videoclip por «El último taxi» y Meyor Canción Otres Escenes por «La nada y tu»), un Premiu al Meyor Cantar por «La nada y tu» y Premiu de la Crítica de la RTPA al Meyor Discu d’autor). Hasta l’añu 2011 tuvo presentando estes grabaciones per toa España, llegando a rematar la xira en Colombia, acompañáu de Pablo Moro.

Nel añu 2012 publicó Dobleces (Algamar Producciones), con diez cantares en castellanu y diez n’asturianu (les últimes con lletra del escritor Pablo Texón), y onde collaboraron artistes de la talla de Quique González, Fabián, Fernando Macaya o Hendrik Rover. Nel añu 2015, tamién col mesmu sellu, publica La paciencia del faquir, una vueltina más de tuerca nes composiciones d’Alfredo, que contó cola producción del ilustre Paco Loco, nel estudiu d’él n’El Puerto de Santa María.

L’añu 2016 truxo un llibru debaxu’l brazu. La editorial Bandaaparte publicó’l primer poemariu d’Alfredo, una colección de poemes mui cuidada que se presentó per tol Estáu y que llegó a tar cinco semanes entre los llibros que más se vendieron de poesía según El Cultural del diariu El Mundo. D’entós p’acá, Alfredo lleva trabayando n’Afluentes ensin parar de tocar en conciertos pelos escenarios típicos d’él.

 

Be the first to comment

Leave a Reply

Tu dirección de correo no será publicada.


*