Juan Dávila: l’ambigüedá al serviciu de la dignidá

Carteles interveníos de Juan Dávila.
Carteles interveníos de Juan Dávila.

HENRIQUE G. FACURIELLA
Juan Dávila (Santiago de Chile, 1946) nun ye un artista mui conocíu n’España, anque España sí ta mui presente na so obra, iconoclasta y tresgresora. El Muséu d’Arte Contemporaneu de Castiella y Llión (MUSAC) acaba de dedica-y una esposición monográfica –la primera que se fai nel Estáu– baxo’l títulu Pintura y ambigüedá, al cuidáu del comisariu Paco Barragán –que yá entamara otra sobre’l mesmu artista nel 2016 pal Centru Cultural Matucana 100, de la capital chilena–. Na muestra del muséu llionés, que se puede ver hasta’l 18 de payares, enséñense más de cincuenta obres, ente óleos, dibuxos, carteles y intervenciones sobre’l propiu espaciu museísticu. Nenguna d’elles dexa indiferente al espectador y munches podíen hasta considerase «una provocación inalmisible» nesta etapa de resurdir del espíritu nacionalista español.

'Tratado de Tordesillas' (2018), de Juan Dávila.
‘Tratado de Tordesillas’ (2018), de Juan Dávila.
'Simón Bolívar', de Juan Dávila.
‘Simón Bolívar’, de Juan Dávila.

Nes sos obres, Dávila nun dexa santu con cabeza –llámese Simón Bolívar o Papa de Roma– nin símbolu del que nun faiga escarniu –la rojigualda ente ellos– pa llamar l’atención sobre situaciones d’inxusticia, de discriminación o, directamente, d’abusu. Nesti sen, ye feroz la so denuncia del colonialismu, sobre manera de la dominación española n’América Llatina. Exemplu d’ello ye’l cartel –que, como munchos otros de los d’él, asonsaña los posters de promoción turística– apaez rotulao «España. Pide Perdón. Por genocidio y robo en Latino América. 1492-1826» o’l cuadru Tratado de Tordesillas, onde un rapaz européu desnudu avérase per detrás a una figura precolombina, tamién desnuda pero capada, colo que quier representar el tipu de rellación qu’España caltuvo –y, en dellos casos, tovía caltién– coles naciones de l’América hispana.

Esti usu de l’ambigüedá sexual ye un recursu que Dávila aplica abondantemente nes sos obres y, con él, da la vuelta a discursos asentaos na sociedá pero que, nel fondu, nun respuenden a realidá dala. Asina, por exemplu, nun tien duelgu nengún a la hora de «desacralizar» la figura del llibertador Simón Bolívar, al que caracteriza con rasgos femeninos, colos que quier representar a tolos descartaos de la historia oficial –el transexual, el mestizu, la muyer, el refuxáu, l’indiu…– y que son tamién motivu de vergoña (y víctimes de la violencia) dientro les sociedaes «llibres» que nacieron tres de la dominación española.

Con too, nun falten na esposición miraes más positives, rellacionaes sobre too con una sociedá primitiva –quiciás tan naïf como idílica–, representada, por exemplo, na obra Códice florentíno 10. Pintada directamente sobre ún de los ventanales del muséu, de manera qu’ún de los patios interiores val-y de fondu –lo que crea efectos visuales mui interesantes–, la figura principal ye un rapaz medio desnudu que cultiva maíz y que ta tomada, directamente, de la Historia general de las cosas de Nueva España (conocida anguaño como Códice florentín), cola que’l franciscanu Bernardino de Sahagún quixo dar a conocer dellos aspectos de la cultura y la historia de los pueblos del altiplanu central de México con dos fines, seique contradictorios: per un llau, desaniciar les creencies relixoses de los nativos mexicanos y, pel otru, convencer de la necesidá de volver a les lleis naturales peles que se mandaben los indios enantes de la llegada de los españoles.

'Códice Florentino 10' (2018), de Juan Dávila.
‘Códice Florentino 10’ (2018), de Juan Dávila.

Quiciás la ambigüedá que s’atopa na obra protoantropográfica de Bernardino de Sahagún ta emparentada cola qu’alcontramos nel trabayu artísticu de Juan Dávila, una ambigüedá qu’a lo que lleva, precisamente, ye a clarificar, a esbillar el granu ente la poxa y poner, penriba de too, la dignidá de les persones –especialmente, de les persones que nun encaxen na norma–.

Juan Dávila: Pintura y ambigüedad
MUSAC Muséu d’Arte Contemporaneu de Castiella y Llión
Hasta’l 18 de payares

Be the first to comment

Leave a Reply

Tu dirección de correo no será publicada.


*