Julie Mehretu ye una artista etíope que vive en Nueva York. Nes pintures que fai, que tienen unes dimensiones grandísimes, pon, unes enriba d’otres, capes d’acontecimientos históricos, alcordances, sensaciones y esperiencies de la vida. Un turbón d’impactos visuales que busca l’harmonía y que tresmite con bien de fuerza, y con un usu de los colores maxistral, les cabilaciones de l’artista polos tiempos que vivimos y l’espíritu críticu pa con ellos.
Julie Mehretu presenta una esposición nel Centru Botín en Santander hasta’l 25 de febreru del 2018, que se titula Una historia universal de too o nada. Entamada en collaboración col Muséu Serralves d’Arte Contemporaneu d’Oporto, la muestra ye la retrospectiva más importante dedicada n’Europa a esta artista, que ta considerada a nivel internacional como una de les pintores que más destaquen de la quinta d’ella.
La esposición cuelga una esbilla de 30 pintures y cerca 60 dibuxos que se centren en momentos clave de la creación d’ella: dende los dibuxos primerizos en grafitu o les pintures en tinta o acrílicu, hasta los llenzos grandiosos, onde les superficies tan mui trabayaes y componen arquitectures complicaes, feches a base de tinta, pintura, borraos, rayes y xestos.
Una historia universal de too o nada
Julie Mehretu
Centru Botín, Santander
Hasta’l 25 de febreru del 2018
Leave a Reply