La instalación de videu ’Otra vez’ fai preguntes molestes sobre la ultraderecha alemana

Fotograma del videu 'Again'.
Fotograma del videu 'Again'.

La videocreación última del artista alemán Mario Pfeifer céntrase nun ataque xenófobu soterráu. Hai dos años, unos socesos violentos que pasaron nel estáu de Saxonia tuvieron mui poca atención de los medios de comunicación. Pero agora fai alcordanza d’ellos Mario Pfeifer na instalación Again / Noch Einmal (Otra vez), que se convirtió nun trabayu que llamó l’atención na Bienal de Berlín d’anguaño.

La obra ye un seudo-documental, que se reproduz a la vez en dos pantalles, y cuenta la historia d’un rapaz refuxáu iraquí que se llamaba Shabaz Al-Aziz, que llegó solu p’Alemaña en 2015, buscando ayuda pa tratar la epilesía que tenía y que nun podía tratar n’Iraq. Un día del añu 2016, dio-y una especie de crisis mental nuna tienda comestibles d’Arnsdorf. Después de dir a la tienda delles veces nel mesmu día, mui alteráu, ente cuatro paisanos sacáronlu del supermercáu y amarráronlu a un árbol. El socedíu grabáronlu en videu con un móvil y difundióse y fíxose viral ensiguida. Esi videu real tamién s’emite na instalación de Pfeifer con otres imáxenes que recreen actores. Munchos vecinos dixeron que lo que fixeron los cuatro homes yera un «actu desinteresáu de valor». El trabayu de Pfeifer cuestiona esi puntu de vista.

Un casu xudicial que se desestimó

El xuiciu de los homes acusaos de pegar a Al-Aziz y d’atalu a un árbol nun salió alantre. La víctima yá nun taba viva pa testificar: descubrióse qu’Al-Aziz morriera xeláu en monte una semana enantes del xuiciu. Los cuatro paisanos nun teníen antecedentes penales y el tribunal basóse na «falta d’interés públicu». Los partidarios de los partíos fascistes y de derecha estrema aplaudieron la decisión.

El casu pasó nuna zona cerca d’onde nació Mario Pfeifer, Dresde. L’artista diz que na obra «fai preguntes fundamentales sobre la sociedá civil alemana d’agora». Tien mieu de que’l que se desestimara’l xuiciu contra los implicaos equivalga a dar carta blanca pa que les persones faigan ellos la xusticia como una manera de demostrar el «valor civil».

'Again', de Mario Pfeifer.
‘Again’, de Mario Pfeifer.

Na videocreación –que paez una película de cine comercial–, Pfeifer axunta un xuráu popular pa que vean cómo pasó’l socedíu y cómo lo trataron los medios de comunicación y los vecinos de la ciudá onde pasó. Los miembros del xuráu, non los actores, sinón les persones que se tán confrontando coles esperiencies d’ellos nel tema del racismu n’Alemaña, al velo, a veces pónense a llorar. L’impactu, la condena y l’horror que nun se vieron naquel momentu del socesu nos medios y na sociedá alemana son, na grabación, unánimes y grandes pal grupín retratáu na película. Ún de los xuraos piensa en voz alta: «¿Pasaría lo mesmo si fuera un alemán?» La respuesta que da ye que nun ta seguru. Otra de los xuraos diz que nun tien fe nos tribunales.

El papel social del arte

Again (Otra vez) ye un trabayu sobre la memoria. L’arte ye importante pa trabayar pola xusticia y pa defender a les monoríes. L’arte puede enseñar tendencies y contradicciones sociales, facer que se mire pa maneres de narrar alternatives y facilitar los debates. La obra viose na Bienal de Berlín y anda rodando per museos. Hasta’l 3 de xineru de 2019 pue vese en Muséu Kunstsammlungen Chemnitz.

Be the first to comment

Leave a Reply

Tu dirección de correo no será publicada.


*