La música tradicional mirandesa llega a Uviéu con un conciertu de Galandum Galundaina

Galandum Galundaina. Fotografía: Manuel Teles.
Galandum Galundaina. Fotografía: Manuel Teles.

La tierra de Miranda tien un patrimoniu musical y etnográficu mui grande y únicu, que tuvo escaecíu munchu tiempu. Galandum Galundaina lleva más de venti años faciendo por recuperar, recopilar, estudiar y enseñar la identidá cultural de Miranda. Primero, recoyeron de les persones más vieyes la tradición de manera bien rigorosa, depués, miraron por ella y trabayáronla. La propuesta musical d’esti cuartetu de paisanos concretóse nuna forma nueva d’entender los sones que se conocíen allá dende siempre, nesa tierra onde se fala y ye oficial una variante de la llingua asturiana, la mirandesa.

Galandum Galundaina tienen editaos tres trabayos discográficos (mui emponderaos polos críticos) y un DVD en vivo pero, amás, furrulen como un motor d’eventos de cultura tradicional. Tamién trabayen faciendo los instrumentos que toquen y tienen el méritu de ser un grupu de referencia na estandarización de la gaita de foles mirandesa.

Pa Galandum Galundaina la música nun se crea, atópase. Nel escenariu, esti cuartetu presenta un repertoriu vocal y instrumental que repasa tola herencia del cancioneru tradicional de les tierres de Miranda. De la zanfoña, la gaita de foles, la xiblata los pastores, el rabel, el cántaru, los pandeiros, el bombu… naz una música hermana de l’asturiana.

No tocante a conciertos, yá tocaron en tolos continentes. El que van dar n’Uviéu, na sala de Cámara del Auditoriu, va empezar a les ocho la tarde’l sábadu 24 de payares y faise dientro del programa de les xornaes «Sentir Portugal» qu’entamen el conceyu la capital y Progestur.

Be the first to comment

Leave a Reply

Tu dirección de correo no será publicada.


*