La música y la voz pura de Tania Pereira

Tania Pereira.
Tania Pereira.

Tania Pereira medró en Xedré, una aldea del conceyu Cangas, nel suroccidente asturianu. Los primeros pasos nel mundu de la música diolos col padre, Pedru Pereira –tamién compositor y cantautor–, nel grupu folk Brandal, onde Tania yera la voz y la guitarra. Colos años, marchó a vivir pa Londres pa preparase pa la carrera musical d’ella sóla y col aquel de topar soníos nuevos pa les composiciones.

La fuercia de caúna de les canciones esgarradores qu’interpreta engancha al públicu en cada conciertu en directu. Silvio Rodríguez, Triana, Eva Cassidy, Jeff Buckley o Ben Howard son delles de les influencies musicales que tien esta canguesa. Rayadines de rock alternativu, indie folk, blues británicu o pop independiente vense nes canciones nueves que canta, siendo quién a llograr un soníu personal, colo mínimo, que la distingue.

Nel añu 2015 grabó y sacó los primeros dos trabayos en solitario, el single doble Firefly n’inglés y l’EP Camino Lejano en castellanu, colos que llegó a tocar en delles ciudaes d’España, Noruega y Inglaterra. Pal añu siguiente, diba ser una de les convidaes a cantar con Victor Manuel en Xixón dientro de la xira 50 Años nun ye nada.

Anguaño ta trabayando nel que va ser el priemer LP, que ta previsto que salga pal 2020 y del que yá se conocen los primeros singles: «La Mujer que Corría con los Lobos» y «Sauce Llorón».

Be the first to comment

Leave a Reply

Tu dirección de correo no será publicada.


*