La Pinacoteca de Llangréu, una colección completa d’arte abstractu asturianu

Pinacoteca de Llangréu.
Pinacoteca de Llangréu.

Cuenten los vieyos que, desque abrieren les mines de Llangréu, los de Sama enchipábense toos delantre de los de Llaviana (que yera u taba’l partíu xudicial daquella) de que comíen carne fresco y los del «papu» teníen que comelo salao porque nun teníen mataderu. Nel 1929, Sama estrenó un piñu d’edificios nuevos pa matar ganáu que trazó Francisco Casariego. Col pasar de los años, estes edificaciones sufieron cambios y amiestos hasta llegar a ser once construcciones que se completaron con un depósitu d’agua mui particular. Esti serviciu municipal guardaba un elementu d’interés dientro de la cadarma: un sistema mui llográu de carriles d’aceru fechu n’Altos Hornos de Vizcaya en 1920 que recorría tolos pabellones pa colingar y carretar les pieces de ganáu peles distintes zones del mataderu, saliendo incluso pa fuera pa la cámara que facía de nevera.

pinacoteca_02Depués de que quedó pasáu y ensin usu, l’ayuntamientu de Llangréu fixo un concursu d’idees pa igualo too y da-y otru usu como pinacoteca. L’aquitectu asturianu Jovino Martínez Sierra propunxo mantener los tres edificios que primero se fixeren y crear una pieza nueva horizontal pa colingar la colección de cuadros del conceyu. Por falta cuartos, al final, la rehabilitación recuperó los edificios que yá taben uniéndolos con una galería de cristal y nun se fixo más nuevo. Tamién se punxo munchu procuru en recuperar los carriles que diben pel aire como elementu qu’unificara la obra y que sirviera pa llevar los cables de la lluz, l’aire acondicionao y ayudara a colingar les obres si facía falta. L’arquitectu nesti trabayu quixo que nun se viera muncho la mano d’él, dexando’l protagonismu a esti conxutu históricu d’arquitectura civil. Nel terrén que se lliberó na redolada de los edificios creóse un parquín que fixo que la finca dialogara más col ríu y lliberó un espaciu onde se podíen poner escultures nel futuru.

Los de Sama, y los llangreanos en xeneral, puen bien siguir presumiendu de mataderu agora que lo usen de pinacoteca pa guardar, como un tesorín, una de les colecciones más completes y delicaes d’obres d’arte abstracto contemporánees de pintores, la mayoría, asturianos. Y ye que la riestra de nomes ye completísima: nun falten los veteranos Bernardo Sanjurjo, Eduardo Úrculo, Miguel Ángel Lombardía, Jesús Díaz, Zuco. Y nomes con carreres artístiques bien consagraes, nacíos depués de mediau’l sieglu XX, como Miguel Galano, Juan Stové, Ricardo Mojardín, Vicente Pastor, Pelayo Ortega, Avelino Mayo, Melquiades Álvarez o Helios Pandiella (que tamién ye diseñador gráficu). A estos nomes tamién s’amiesten los de Kely Méndez Riestra, Javier Vitorero, Isabel Cuadrado, Natalia Pastor, Hugo Fontela, Ramón Isidoro, Pablo Maojo, Lisardo Menéndez y munchos más. Tampoco falta un sitiu pa obra escultórico d’Herminio y d’Eugenio López.

La mayoría de de les obres de la pinacoteca llangreana son donaciones de la Sociedá La Carbonera que lleva munchísimos años entamando una bienal nacional d’arte cola que foi componiendo una colección de munchu valor.

Be the first to comment

Leave a Reply

Tu dirección de correo no será publicada.


*