Dende que se creó hai más de 15 años, l’Asociación MED-OCC (mediterráneu occidental) tuvo convencida de qu’existen munches afinidaes artístiques y culturales ente los creadores contemporaneos de países diferentes, a pesar de nun se conocer unos y otros. Por eso vieron la necesidá de buscar espacios d’intercambiu y debate permanente qu’ayuden a desendolcar, nel ámbitu de les artes visuales contemporánees, los llazos culturales desconocíos ente España y otros países como Marruecos, Siria y, anguaño, Irán. Con Miraes Paraleles. Irán-España: fotógrafes nel espeyu, úfrese’l primer alcuentru ente creadores de los dos países mediante la selección de seis pareyes de fotógrafes que sorprenden colo asemeyao de la obra d’elles, gracies a otra mirada, la de los comisarios, Zara Fernández de Moya y Santiago Olmo.
El visitante que percuerra la muestra va poder descubrir cómo les doce fotógrafes de Miraes Paraleles, artistes de primera, rellumen, emocionen y dan una esposición perguapa, plagada d’histories y visiones inquietantes: Soledad Córdoba y Shadi Gadirian; Cristina García Rodero y Hengameh Golestan; Amparo Garrido y Rana Javadi; Isabel Muñoz y Gohar Dashti; Mayte Vieta y Ghazaleh Hedayah; María Zarazúa y Newsha Tavakolians.
Les series de semeyes que s’enseñen nel Muséu Barjola hasta’l 21 de xineru del 2018 son d’etapes y años mui diferentes de les autores, pero les correspondencies tan ehí, presentes. La calidá de les obres ye altísima.
Miraes Paraleles. Irán-España: fotógrafes nel espeyu
Muséu Barjola, Xixón
Hasta’l 21 de xineru del 2018
Leave a Reply