Pa llenar les pistes de baille

Anabel Santiago.
Anabel Santiago.

Anabel Santiago ye una de les voces más grandes d’Asturies. El repertoriu d’ella, dende qu’empezó, mama de la tonada y d’otros palos de la música tradicional del país. Anabel siempre quier esperimentar y modernizar lo que canta meciéndolo con otros ritmos y sones d’anguaño. Esi ye’l resultáu de la mayoría de la discografía que publicó y del discu Y_andá, l’octavu qu’edita y onde, a partir de les melodíes o les lletres de dellos cantares tradicionales de la península ibérica, crea variaciones incorporando otros ritmos o otres lletres de composición propia. Tamién canta una versión d’ella del poema de Rosalía de Castro «Adiós ríos, adiós fontes».

Nesti trabayu hai guitarres eléctriques, percusión tradicional, teclaos pop-indie y bases electróniques, dance chiscao de pop, vaqueiras con loops electrónicos, balaes, trap y hasta aires de saeta. El fin ye llegar cola música d’inspiración tradicional a les pistes de baille. La llibertá cola que crearon nesti discu ye total, de manera que, nel tema «Jot-eira», a partir d’una xota, pásase na mesma pieza a una muñeira. Anabel quier descuadrar los prexuicios y redefinir la música tradicional pa xenerar electrotrad. Pa esti trabayu contó cola collaboración de Fruela 757, Chus Naves, Emilio Fidalgo, Helios Amor, Manuel Cordero y les pandereteres Compañeras.

Una de les pieces más guapes de Y_andá ye «La llave de la alegría», un cantar tradicional d’Aliste (Zamora) versionáu. Dende’l puntu de mira llingüísticu, anque hai coples n’asturianu y un cantar en gallegu, la mayoría de les pieces tan cantaes en castellanu.

 

Be the first to comment

Leave a Reply

Tu dirección de correo no será publicada.


*