Con más de 4.500 participantes na categoría de diseñu de productu, el red dot design award, llega a más defensores del bon diseñu que cualquier otru concursu d’estes característiques. El so premiu, el puntu encarnáu (red dot), convirtióse yá nuna seña de calidá na estética de les formes, la vanguardia nes tendencies y los diseñadores con un sentíu de la responsabilidá fuerte.
Los 30 espertos internacionales que formaron el xuráu de la convocatoria del 2012 examinaron, probaron y evaluaron individualmente caún de los 4.515 productos presentaos a concursu. Ente los criterios qu’aplicaron nel xuiciu, atópense’l nivel d’innovación, la funcionalidá, la calidá y la compatibilidá medioambiental.
El resultáu son 1.058 productos premiaos col red dot nun total de 19 categoríes, ente los que s’alcuentren dende oxetos pequeños –como clips pa papel o audífonos– hasta muebles, coches o proyectos d’arquitectura. Amás, la calidá más alta prémiase col gallardón red dot: best of the best, que, nesta edición, llevaron 62 diseños, namás que’l 1,37% de tolos productos que se presentaron al concursu.
Col red dot design award, el Design Zentrum Nordrhein Westfalen, con sé na ciudá alemana d’Essen, creó una de les competiciones de más sonadía internacional, hasta’l puntu de que’l red dot ta consideráu en tol mundu como una de les marques de calidá del bon diseñu gracies al trabayu escepcional del xuráu. Amás, nel red dot desing museum puen vese, a lo llargo de tol añu, los productos premiaos.
Estos premios divídense, amás, en tres disciplines: red dot design award: product design, red dot award: communication design y red dot award: design concept, anque esti últimu organízase en Singapur dende’l 2005.
Convocatoria 2013
En payares del 2012 abrióse la convocatoria pa presentar proyectos al red dot design award: product design, un plazu que va durar hasta’l 6 de febreru del 2013. El 18 d’avientu va celebrase la xornada pa profesionales mozos, que van poder facese con una de les 50 inscripciones gratuítes. Pue atopase más información na páxina web: www.red-dot.de/pd.
Leave a Reply