Sentir cómo nos sienten les plantes: los robós, l’arte y la naturaleza

The Plants Sense
The Plants Sense. Fotografía: Marcos Morilla.

The Plants Sense (El sentír de les plantes), 2018, ye una instalación fecha pa que los visitantes puedan conocer y sentir el llinguaxe de les plantes y qu’usa un traxe intelixente fechu con tecnoloxía que ye quién a tresmitir información d’un emisor a un receptor. Esta creación axunta arte, ciencia, tecnoloxía y sociedá.

La obra ye un xardinín interactivu onde dellos sensores miden les oscilaciones llétriques de les plantes que los lleven, y tresmiten les reacciones bioquímiques que siente polos cambios nel ambiente o pola presencia de les persones. Esta información toa procésase y traduzse en vibraciones y en soníos de frecuencia baxa que permiten sentir les plantes, más allá del tactu o de la vista, si se pon el traxe o si se toquen coles manes los dispositivos.

Al tar conectada a les plantes y al movese, la persona entama una manera de comunicase nueva con elles. Pa los responsables del proyectu, María Castellanos y Alberto Valverde, ye una manera «d’entender el llinguaxe vexetal, imposible ensin l’ayuda de los sistemes y robós desarrollaos pa la obra», porque «los dispositivos traducen les señales que los humanos nun son quién a entender, por culpa del sistema de percepción llimitáu nuestru». Esti proyectu d’El sentir de les plantes tien l’apoyu de la Comisión Europea –dientro del programa Starts, que ta basáu n’elementos tecnolóxicos de Flora Robótica– y del centru públicu asturianu Llaboral.

Flora Robótica ye un proyectu pa desendolcar y investigar les rellaciones ente los robós y les plantes naturales y esplorar el potencial d’un posible robó vexetal que produza espacios de vida. Mientres la sociedá de consumu camina nuna economía de crecimientu continuu y d’estroza y contaminación de los recursos naturales, choca que xenere espacios de rellación ente la informática, la robótica, la bioloxía molecular y celular, la zooloxía etc., cola fin de crear espacios naturales non naturales.

The Plants Sense
Llaboral Centru d’Arte, Cabueñes, Xixón.
Hasta’l 22 de setiembre.

Be the first to comment

Leave a Reply

Tu dirección de correo no será publicada.


*