Un logotipu (bien fechu) val más que mil palabres (bien escrites)

Logotipu de TheDesk, en Hong Kong, del diseñador Toby Ng.
Logotipu de TheDesk, en Hong Kong, del diseñador Toby Ng.

TheDesk ye un espaciu de trabayu a comuña abiertu em Hong Kong qu’ofrez más qu’un entornu afayadizu pa trabayar, porque tien la misión d’entamar comunidaes inclusives –globales y llocales– de la que favorez el crecimientu empresarial. A la hora de pensar nuna imaxe de marca que diferenciara esti espaciu d’otros qu’hai nel mercáu, decidieron que tenía que destacase la importancia de les persones y tamién la idea de comunidá o grupu y de la conexón ente elles.

El logu de TheDesk ta fechu con un redondel partíu en dos por un rectángulu de tal manera qu’al montar el rectágulu nel círculu vese una lletra D, que val como abreviatura de Desk (mesa d’escritoriu o d’oficina n’inglés). Les meses d’esti espaciu son redondes. Les persones siéntense nelles cuando quieren xuntase a trabayar o a conocese y formen comunidaes mayores. Por eso theDesk ye una plataforma que sirve pa la collaboración. El logu úsase n’aplicaciones onde funciona como elementu base, como patrón que se multiplica pa señalar más la condición d’espaciu flexible y válidu pa munches posibilidaes de trabayu.

Amás, esti logotipu coles formes xeométriques llimpies y fáciles d’identificar que tien val pa dar idea de los espacios arquitectónicos elegantes y minimalistes nos que ta dividío TheDesk. En resumíes cuentes, un trabayu gráficu de nivel, con una señalética que naz d’él y con una estratexa de comunicación integral resuelta perbién, xugando con fondos de colores blanco y prieto que los ruempe un verde vivu y ácedu.

L’autor d’esti desarrollu gráficu ye Toby Ng, un estudiu especialista en diseñu gráficu y de diseñu de marques independiente. Trabayen so la filosofía de que la imaxe ye la estratexa y ye’l mensaxe. Son una de les axencies más representatives de Hong Kong y cuenten col reconocimientu que suponen dellos premios importantes que llevaron n’Europa, América del Norte y el Xapón. L’enfoque creativu que gasten ye destilar les idees hasta dexales na esencia pura. Cuando la imaxe ta bien trabayada fala de manera que convece.

Espacios de trabayu en TheDesk.
Espacios de trabayu en TheDesk.

Toby Ng, qu’estudió y se formó nel oficiu en Londres, ta mui bien consideráu no profesional y ye ún de los diseñadores menores de 40 años más buenos d’Asia. Amás, obres d’él enseñáronse en museos de munchu postín como la National Portrait Gallery de Londres. Per otru lláu, una de les iniciatives personales poles que ye mui conocíu Ng ye un trabayu gráficu que fixo nel añu 2011 yá y que se titula The World of 100, onde reduz les proporciones de los datos que definen la vida de la población del mundu enteru a una metáfora: un pueblín con cien persones namás. Esti trabayu ta publicáu nun llibru. Merez muncho la pena conocer la obra d’esti rapaz.

Be the first to comment

Leave a Reply

Tu dirección de correo no será publicada.


*