‘42.553 Depués de Buchenwald’: un rellatu imprescindible sobre la dignidá

Vicente García y Xuan Santori de la que llegaben a la presentación del llibru, nel Muséu Arqueolóxicu.
Vicente García y Xuan Santori de la que llegaben a la presentación del llibru, nel Muséu Arqueolóxicu.

HENRIQUE G. FACURIELLA
«Quixi dar testimoniu de lo que viví na guerra d’España, en Francia y n’Alemaña pa despertar a la mocedá; lo que yo pasé nun quiero que lo pasen ellos». Con estes palabres empezaba la so intervención na presentación del ensayu 42.553 Depués de Buchenwald, de Xuan Santori, el protagonista d’esta historia: l’asturianu Vicente García (La Pola, Siero, 1925), deportáu con 18 años al campu de concentración de Buchenwald, Alemaña, por collaborar cola resistencia francesa contra los nazis. Nel mesmu actu de presentación – el 12 de xunu, nel Muséu Arqueolóxicu d’Asturies–, Santori calificólu como «militante fiel de la memoria», una militancia que, a los sos 93 años, García sigue exerciendo con la conciencia del que sabe que’l so trabayu ye «defender la llibertá de toos porque nes guerres qu’hai per tol mundu los palos llévenlos siempre los pequeños», tal como dexó dicho tamién na presentación del llibru col que Santori ganó’l XXIII Premiu d’Ensayu «Máximo Fuertes Acevedo».

La llegada de Vicente García, del brazu de Xuan Santori, a la puerta del Muséu Arqueolóxicu, foi d’una solemnidá qu’estremecía. La marcha que tocaba una parexa de gaita y tambor nun yera quién a tapar el silenciu –d’un respetu que raspiaba la reverencia– que se fixo de la que los dos homes xubíen la cai de San Vicente. A la entrada del vieyu monesteriu benedictín, esperábenlos el conseyeru d’Educación y Cultura, Genaro Alonso; la vicealcaldesa d’Uviéu, Ana Taboada, y el conceyal uviedín de cultura, Roberto Sánchez Ramos, ente otres autoridaes, amás de parte del públicu, un públicu que, na so mayor parte, tuvo que quedar de pies porque los asientos del salón d’actos del muséu nun fueron abondo pa acomodar a tola xente que s’allegó a sentir el testimoniu de Vicente García.

Esti testimoniu ta recoyíu con procuru y respetu nel ensayu de Xuan Santori, un llibru que, ensin facer nenguna concesión al sensacionalismu, tresmite fielmente les penalidaes que pasa’l protagonista desque marcha d’Asturies al cayer el frente del norte –dexando al padre y a los hermanos mayores– hasta que, tres de la lliberación del campu de Buchenwald, vuelve al pueblu francés onde vivía la madre. Pente medies, l’ingresu na resistencia francesa como enllaz y espía, la detención, les cuelmes nes cárceles de la Xestapo, la deportación a Buchenwald y l’esfuerciu por resistir nel campu.

Precisamente, ye esta capacidá d’aguantar, de nun se dar –porque dase supón la muerte–, la clave de bóveda de 42.553 Depués de Buchenwald. Nun ye casualidá qu’al principiu de la narración el llector s’alcuentre con dos referencies filosófiques: la de Viktor Frankl, sobreviviente tamién del horror nazi –nesti casu, del campu de concentración d’Auschwitz– y buscador incansable de les claves de les que depende la sobreviencia o la muerte del individuu –la so obra fundamental ye L’home a la busca de sentíu–, y la de Friedrich Nietzsche, que sentenció: «Quien tien un porqué pa vivir, alcontrará un cómo». De la historia de Vicente García, Santori va destacar los momentos onde meyor se pueden alcontrar les respuestes a esa busca d’un sentíu pa siguir viviendo en mediu de la deshumanización y la muerte.

Ficha personal d'internu de Vicente García.
Ficha personal d’internu de Vicente García.

Esti planteamientu esplica que sían tan escasos –y tan reservaos nos detalles– los pasaxes onde se describen les práctiques más aberrantes, un criteriu que l’autor sigue tamién a la hora d’escoyer les imáxenes qu’ilustren el llibru. La asepsia aparente de les fotografíes coles que se documenta l’actividá cotidiana del campu ye más reveladora de lo «terrible» del sitiu y de la situación –terribilis est locus iste– que les semeyes de los cuerpos consumíos que sacara’l Tercer Exércitu Americanu de Patton depués de la lliberación del campu. Esto ye asina porque, nel esmeru de los mandos de les SS por documentar la «vida» en Buchenwald –y hasta nel procuru col que se tabulen les llistes de presos, les altes y les baxes de les brigaes de trabayu–, espéyase d’una manera tan cruda como precisa lo que los presos representaben pa los xerarques nazis: pieces –non persones– d’una maquinaria industrial onde la muerte –directa o causada poles condiciones de trabayu– yera un pasu más nel procesu productivu.

Asina, nun ye d’estrañar que, narrativamente, Santori ponga’l focu tantes veces na despersonalización y desindividualización a les que les SS sometíen a los deportaos: el nome camúdase nun númberu; la cara, nunos rasgos uniformizaos por cuenta del pelu al rape, la fame y el piyama de presu; la historia personal, nuna forma xeométrica de colores y una lletra (nel casu de Vicente García Riestra, un triángulu encarnáu con una «S», de rot Spanier, presu políticu español). A esta falta de rasgos personales, Santori opón el nerviu interior de García Riestra, quier dicise, les respuestes qu’esti se da a sí mesmu al ponese delantre de tolos porqués que se-y presenten y que, al final, van ser determinantes a la hora de salir con vida del campu. Asina, Vicente sabe que ta ellí pola so conciencia política –por collaborar cola resistencia– y quier salir d’ellí pa volver con so madre y los hermanos que-y queden.

Con 42.553 Depués de Buchenwald alcontrámonos énte un llibru imprescindible tanto pol fondu como pola forma y los falantes y llectores d’asturianu tamos de norabona porque Santori escoyere escribilu nesta llingua. La historia de Vicente García Riestra ye una llección de dignidá y de resistencia ideolóxica importantísima nesti momentu históricu, cuando paez que la vacuna contra los totalitarismos que supunxo’l descubrimientu del terror nazi ta perdiendo efectividá na sociedá europea y occidental –les midíes anti-inmigración y contra los refuxaos de los Estaos Uníos y de dellos gobiernos europeos son bon exemplu de que nun se puede dar nada por sabío y superao–.

«Conocelu a usté fíxome recorrer los caminos que lleven a una obra verdadera, obligóme a reflexonar, a midir les palabres, a ser meyor persona», dixo na presentación del lllibru Xuan Santori dirixéndose a García Riestra; agora, el frutu d’esi procesu de conocimientu, reflexón y tresmisión de la memoria permítenos a los demás miranos nel espeyu d’una persona «que se fía neciamente de la so conciencia y exemplu moral pa los demás», tal como caracterizó’l mesmu autor al protagonista del so rellatu. García Riestra merez tolos homenaxes que la sociedá quiera face-y pero cuento que’l más importante –y el qu’él más va agradecer– ye que se conoza la so historia y que’l so testimoniu nos lleve a poner les bases pa que nun vuelva pasar aquello. Esti llibru ye’l primer pasu pa ello.

cubierta-depues-de-buchenwald42.553 Depués de Buchenwald
Xuan Santori
Trabe, 2018
174 páxines

Be the first to comment

Leave a Reply

Tu dirección de correo no será publicada.


*