Cases pa probes, la ciudadela de Celestino Solar

La Ciudadela de Capua o de Celestino Solar.
La Ciudadela de Capua o de Celestino Solar.

Al llegar la industrialización a Asturies, produzse un movimientu migratoriu de xente de los pueblos y de territorios vecinos (de Galicia, de Llión y de Zamora, sobre manera) a les zones onde fai falta mano d’obra. Los obreros lleguen a Xixón, Avilés y los valles mineros y necesiten cases. De la necesidá naz la oportunidá pa los especuladores y munchos dedíquense a edificar ciudadeles, piños de casines ruines ensin agua corriente nin retrete priváu. Al haber trabayu nes ciudaes y llegar de contino xente a trabayar, los empresarios pudieron mantener los sueldos perbaxos, dando los xornales pa poco más que pa la renta y pa comer y vistir corrientino a los obreros. La necesidá de vivienda yera mui grande y les edificaciones fixéronse ensin munchu control. Xixón llegó a tener doscientes ciudadeles. Na mazana de Capua, pegada a El Muro y a la playa, nel corazón de la villa, tovía se conserva la que se conoz como Ciudadela Celestino Solar (nome del indianu qu’edificó les 23 viviendes en 1877) o de Capua, aunque’l nome tradicional d’esi sitiu fuere La Garita. Estes cases llevantáronse primero de que tuviera de moda dir a baños o de les cases burgueses que les arrodien.

La entrada pa La Ciudadela ye per un túnel estrechu nel númberu 17 de la cai Capua. Les cases de La Garita teníen de 28 a 38 metros cuadraos dividíos en dos cuartos ensin ventana, cocina a la entrada y la sala (que yera la única pieza con ventana). Toles 23 compartíen cuatro retretes. Una media de cien persones vivieron nesti sitiu más de cien años. Nel añu 2000 el conceyu de Xixón compró’l tarrén y acondicionólo como un espaciu etnográficu únicu nel Estáu pa conservar la memoria obrera de la ciudá. Nel mes de xineru del 2018, depués de dos años d’obres de meyora, abrióse al públicu remocicáu esti espaciu qu’anguaño depende del Muséu del Ferrocarril y que, ente les novedaes, enseña una reproducción d’una vivienda con tol moblame.

La Garita nel tiempu que tovía vivíen nella delles families.
La Garita nel tiempu que tovía vivíen nella delles families.

La historiadora Nuria Vila (Mieres del camín, 1970) tien publicao una obra fundamental sobre esti espaciu –Un patio gijonés. La ciudadela de Celestino González Solar (1877-1977)– onde documenta cómo esta zona que taba fuera de la muralla de Xixón foi la primer mazana del ensanche de la villa, fecha nunos terrenos que yeren marisma y arena y que compró’l Marqués de Casa Valdés al ayuntamientu baratos pa rellenalos cola tierra que se sacó de dragar el puertu, col aquel d’aprovechalos pa edificar cases barates pa obreros y ganar bien nelles coles rentes. Depués de que quitaren a Xixón la categoría de plaza fuerte, nel 1867, y se valtare la muralla, la burguesía de la villa vio la oportunidá de facer un ensanche hacia l’este, nun trazáu con mazanes grandes y cais estreches y poques places pa nun perxudicar los intereses d’ellos. L’ayuntamientu, cola disculpa de nun gastar n’espropiaciones, aceptó que fuere asina. Esi ensanche nun nacía como zona residencial pa ellos vivir, víenlo como una oportunidá de sacar plusvalíes faciendo cases barates p’arrendá-yosles a los obreros: les ciudadeles del barriu L’Arena. Unes construcciones de cases edificaes pa un patiu interior, con mui pocos ventanos –l’ayuntamientu, daquella, ponía impuestos mui caros por cada güecu abiertu nes parés y pol tamañu d’ellos– y con unes condiciones de salubridá mui precaries.

La ciudadela de Capua, El patio –como lo llamaben los vecinos–, tenía a lo primero un pozu pa sacar agua. Pero al tar tan cerca la mar la sal pasaba pal agua y tuvieron que zarralu. Les vecines tuvieron que carretar l’agua dende les fontes públiques hasta los años cincuenta del sieglu venti, cuando-yos punxo una fonte l’ayuntamientu. Estes casines llevantáronse primero que les cases burgueses que les arrodiaron y a lo primero’l nordés llevantaba l’arena de la duna de la playa y enllenaba les cases con ello. Too esto foi primero de facer El Muro, nel añu 1914. Los homes que vivíen nesta ciudadela trabayen a xornal, ensin trabayu seguru, en fábriques, en puertu o a la construcción. Les muyeres o cosíen en casa pa fuera, o trabayaben de cigarreres o en fábriques o en cases sirviendo. La vida yera difícil pa ellos y les rellaciones d’ayuda mutua ente ellos y de vecindá yeren imprescidibles y obligatories nel patiu. Alredor vivía xente acomodao del centru de la villa. Compartíen l’espaciu pero nun se rellacionaben en condiciones d’igualdá. La mayor parte de les ciudadeles y güertes del barriu L’Arena desapaecieron col desarrollismu de los años sesenta, cuando los «rascacielos» d’hasta trece pisos d’altor prometíen «la playa en tolos cuartos». La especulación nun foi quién a acabar cola mazana de Capua, que dientro tien escondida La Garita, El Patio, La Ciudadela. Cases pa probes escondíes ente les cases pa ricos que son memoria de la historia del Xixón obreru de fai más de cien años.

Ciudadela de Celestino Solar
Horariu de branu (15 de xunu al 15 de setiembre): de martes a domingos de 11.00 a 19.00.
Llunes pesllao. Entrada de baldre.

Be the first to comment

Leave a Reply

Tu dirección de correo no será publicada.


*