El Muséu d’Arte Contemporaneu de Llión (MUSAC) enseña la obra de l’artista catalana Núria Güell, cinco pieces que nun podíen tener más interés anguaño onde cuestiona conceptos y estaos como’l sistema patriarcal, el patriotismu y les fronteres, la violencia sexual masculina, la moral doble del catolicismu y, de manera principal, l’usu y abusu del poder machista.
Amás, pa esta esposición, Núria Güell fixo un proyectu a costafecha sobre «lo masculino». L’artista esplícalo con estes palabres: «patriarca, rei, príncipe, emperador, conquistador, líder, xerarca, patrón, amu, maestru, xefe, caudiellu, dirixente, etc,; tenemos claro que toes estes identificaciones masculines son un rellumu de la figura del poder absolutu, de Dios, al que representen, y qu’el mundu xira alredor de los trunfos y miseries d’él. Xeneralizando, podemos dicir que la masculinidá hexemónica nagua por ser adorada, afalagada y servida pa qu’asina puedan calmase les ganes de poder y reconocencia social. ¿Pero ye eso la masculinidá? ¿La masculinidá rueda alredor del poder? ¿Y ye verdá que nun tenemos nada meyor que facer que combayar?»
Estes entrugues, resueltes o non, atraviesen la obra nueva, De putes. Un ensayu sobre la masculinidá, un videu de formatu grande. Pa ser quien a escarbar nel conteníu de la masculinidá, l’artista entrevistó a delles prostitutes de Llión y de Barcelona, porque les considera especialistes nel tema, porque conocen aspectos de la masculinidá que nun ve más naide. Nel ámbitu de la prostitución, los homes siéntense resguardaos de la mirada pública y compórtense tal y como son.
Pa la ocasión, amás de la obra, tamién se presenta un llibrín, con diseñu de Bisdixit y ilustraciones de Cristina Llanos, qu’imita los llibros eróticos, con unes reflexones y testimonios escoyíos de los que salieron nos alcuentros coles informantes de la pieza artística. La edición d’esta obra intenta consiguir un debate sobre la realidá qu’analiza la obra producida y espuesta nel MUSAC.
Núria Güell ye una artista que trabaya col enfrentamientu de fuercies polítiques pa que d’esi choque se lliberen aspectos de la realidá social que tán tapaos o fuera de l’atención de la masa. Con esi fin, nes obres d’ella trabaya con suxetos políticos, con identidaes, con cuerpos, con lleis, con normes morales y dedícase a rellacionalos, hasta con ella mesma. El fín últimu ye atopar les contradicciones étiques de lo que ta consensuao na sociedá pa da-yos vuelta a les posiciones que tán mui enraigonaes, y facer por amoriar les convenciones pa que seamos quién a repensar la sociedá.
Patria y Patriarcáu
LABORATORIO 987
MUSAC
Avenida de los Reis Llioneses 24, Llión
Hasta’l 14 d’ochobre, 2018
Leave a Reply