Afal: les semeyes reales del pueblu español cuando Franco

Gonzalo Juanes, 'Álbum d'Isabel', Madrid, xunu de 1956.
Gonzalo Juanes, 'Álbum d'Isabel', Madrid, xunu de 1956.

Afal ye’l nome d’una revista bimestral especializada en fotografía y cine, editada n’Almería dende 1956 hasta 1967, por José María Artero García (Almería, 1928-1991) y Carlos Pérez Siquier (Almería, 1930). La cabecera d’esta publicación valió tamién pa identificar a trece fotógrafos de toles partes del Estáu que destacaron por retratar la España de Franco en cuenta de dedicase, como quería la dictadura, a facer semeyes pictorialistes. En tiempos bien difíciles pal arte y pa contar discursos diferentes al del Réxime facista, el grupu d’Afal foi quien a enseñar independencia de planteamientos estéticos y frescura, amás de convertise nel motor de la renovación de la fotografía española de depués de la posguerra.

Gonzalo Juanes, 'Xixón en mayu', 1960.
Gonzalo Juanes, ‘Xixón en mayu’, 1960.

La esposición Una aproximación a Afal. Donación Autric-Tamayo naz a partir de la donación fuera serie de la familia Autric-Tamayo a la colección fotográfica del Muséu Reina Sofía, que medró muncho nos años últimos gracies a la nobleza de Carlos Pérez Siquier y d’otros fotógrafos y heriedes d’Afal. De les setecientes obres d’esta donación escoyéronse más de doscientes pa la muestra. Coles incorporaciones nueves, el Muséu Reina Sofía de Madrid álzase como referente pal estudiu y conocimientu d’esti conceyu d’asemeyadores –que queríen y que consiguieron retratar la verdá ensin treatralizar–, y que ye ún de los más fuertes a nivel internacional de la segunda metá del sieglu XX.

Los fotógrafos del grupu Afal nun tuvieron el mesmu estilu, caún conservó el facer les semeyes a la manera d’él y lo que los fexo ser un piñu foi la revista. El grupu formáronlu too homes: Joan Colom (Barcelona, 1921), Gabriel Cualladó (Masanasa, Valencia, 1925), Francisco Gómez (Pamplona 1918), Gonzalo Juanes (Xixón, 1923), Ramón Masats (Caldes de Montbui, 1931), Oriol Maspons (Barcelona, 1928), Xavier Miserachs (Barcelona, 1937), Francisco Ontañón (Barcelona, 1930), Carlos Pérez Siquier (Almería, 1930), Leopoldo Pomés (Barcelona, 1931), Alberto Schommer (Vitoria, 1928); Ricard Terré (Sant Boi de Llobregat, 1928) y Julio Ubiña (Santander, 1921).

La colección Autric-Tamayo foi faciéndose en bien d’años gracies a les adquisiciones del matrimoniu d’abogaos y coleccionistes madrileños Adolfo Autric y Charo Tamayo. Esta pareya tien collaborao muncho como mecenes con dellos museos y instituciones culturales del país.

La esposición ármase en función de los conceptos que marcaron el trabayu fotográficu d’aquellos tiempos, les tensiones estétiques y los planteamientos de la manera de vivir que distinguieron a los retratistes del grupu, enmarcaos ente’l formalismu y el documentalismu, l’humanismu y la esperimentación, el reportaxe y l’ensayu. Pa la muestra, que puede vese hasta’l 19 de payares, andecharon Bernardo Riego y María Rosón.

Una aproximación a Afal. Donación Autric-Tamayo
Muséu Reina Sofía, Madrid
Edificiu Sabatini, sala 430
Hasta’l 19 de payares

Be the first to comment

Leave a Reply

Tu dirección de correo no será publicada.


*