A la mar vanse los ríos… (de plásticu)

Fotografía de Mandi Barker.
Fotografía de Mandi Barker.

El centru Fotografiska de Tallin (Estonia) ta d’estrena de la temporada d’iviernu cola esposición Mar d’artefeactos de Mandy Barker. Esta artista inglesa quier llamar l’atención sobre la montonera de plásticu, por demás, que ta acabando cola naturaleza.

Ta estimao qu’a la vuelta d’un añu viértense al mar más d’ocho millones de tonelaes de plásticu. Ropa, bolsos, moblame, xuguetes, tapones, retretes, flotadores… de too. Esta basura rueda pel mar flotando y acaba acumulándose en dellos puntos. La concentración mayor conozse como’l parche grande de basura del Pacíficu, que cubre un cachu de mar que ye cuasi setenta veces el tamañu d’Asturies.

Les semeyes de l’artista del Reinu Uníu retraten coses qu’atopó de la que recoyía plásticu en dellos sitios del mundu. Nestes fotos cabe de too, dende brazos de muñeques, bolses y balones hasta guyetes, ropa o flores.

Barker ye una fotógrafa y activista única poles obres d’arte d’ella y pola collaboración qu’entama con científicos pero tamién col públicu en xeneral y con organizaciones dedicaes al mediuambiente. L’oxetivu ye llamar l’atención sobre esta estroza que nos afecta a toos y que va a durar y condicionar a munchísimes xeneraciones futures. Y esto nun ye namás un problema de la superficie de los mares, tamién llega a los fondos abisales, como, por exemplu, la Fuesa de les Marianes nel océnau Pacíficu, a una fondura d’once kilómetros.

Les semeyes de Baker tienen un impactu grande nos espectadores. La reacción primera cáusala la guapura total de les imaxes: un cosmos de plásticu de colores. Pero ye poco lo que se sabe entá de cómo va afectar esta cantidá de plásticu pa la salú de la raza humana. Por eso Baker retrata lo que paña y satura les semeyes con ello, pa que tengamos conciencia d’esti problema.

La contaminación pol plástico nel planeta Tierra yá pasó de la raya y muncho más de lo que somos capaces a figuranos. La mayor parte d’ello ye en forma de partícules microplástiques, que pasen a les cadenes d’alimentación hasta llegar a los cuerpos nuestros. Pensamos qu’esto nun pasa, y que los vertederos nos mares nun tan ehí, pero nun ye verdá. Trabayos como’l de Barker nacen pa recordánoslo. La esposición de Fotografiska na ciuda de Tallin tien como oxetivu, precisamente, crear conciencia del problema.

Mandy Barker nació nel añu 1964 y crióse en Hull, una ciudá que ta en ríu Humber. Nel 2018, Barker recibió la Beca d’Investigación y Esploración de la National Geographic Society polos esfuerzos descomanaos d’ella, lo que-y dio pie a participar en dos espediciones úniques nel 2019: una pa Lord Howe Island pa estudiar la mengua de los rebañaos d’aves marines de Shearwater por culpa de comer plástico, y otra pa la Isla Henderson, apartada y deshabitada, pero que también ta considerada como la isla más contaminada col plástico del planeta.

Nel añu 2017, el primer libru que sacó, tituláu Beyond Drifting (más p’alla de la deriva), foi incluyíu na llista del Smithsonian de los meyores llibros de semeyes de 2017. El llibru últimu que publicó, n’abril d’esti 2019, tituláu Altered Ocean (Océanu alteriau), ye una colección completa de semeyes qu’enseñen les consecuencies catastrófiques de los plásticos que contaminen los mares.

Be the first to comment

Leave a Reply

Tu dirección de correo no será publicada.


*