Marta Mori, Consuelo Vega y Henrique Facuriella participen nel recital «Compañeru, dame tira» na Casa los Alberti, en Ciañu

Marta Mori, Consuelo Vega y Henrique Facuriella.
Marta Mori, Consuelo Vega y Henrique Facuriella.

Los escritores Marta Mori, Consuelo Vega y Henrique Facuriella van participar esti xueves, 21 de payares, a les 20:00 nel recital poéticu «Compañeru, dame tira», dientro de les X Xornaes Culturales Castilletes y Carbón, qu’entamen la Fundación Nuberu y el Conceyu de Llangréu. El coordinador del alcuentru lliterariu, que se va desenvolver na Casa los Alberti de Ciañu, ye’l tamién escritor Chechu García.

Estes xornaes culturales –qu’empezaron el miércoles 8 d’ochobre cola proyección, nel Cine Felgueroso de Sama, de la película Enterrados, de Luis Trapiello– lo que busquen ye tanto un averamientu como un intentu d’interpretación de la mina y de too lo que l’arrodia al traviés de la música, el cine y la lliteratura, amás del estudiu académicu dende disciplines estremaes. Exemplos d’ello son tanto’l recital del día 21 como la conferencia del xueves 28, sobre la percusión tradicional n’Asturies, al cargu de Julio Sánchez-Andrade, catedráticu de Percusión nel Conservatoriu Superior de Música d’Uviéu.

Tocante a les persones participantes nel recital, Marta Mori (Xixón, 1965), acaba de publicar el poemariu Orfandá (Trabe) –el quintu de la so carrera–, un conxuntu de 34 poemes onde l’autora fai un repasu dende la infancia a la madurez pero pasáu pela peñera de la muerte del padre y la derrota interior que produz la crueldá de l’ausencia, la certeza de que la conversación aplazada yá nun va poder tenese. Consuelo Vega (Bustiyé, Ayer, 1961), de familia minera, tien traducío delles obres del alemán al asturianu, tal como La muyer manzorda (Trabe), del Premiu Nobel austriacu Peter Handke; tamién ye autora d’obres de narrativa breve, recoyíes, la mayoría d’elles, nel volume Más espeso que l’agua (Saltadera), que llevó’l premiu de la Tertulia Malory al Meyor llibru n’asturianu del 2014. La narrativa de Vega amuesa al llector el misteriu que s’escuende tres de lo cotidiano, siempre con una prosa esencial y cuidada. En cuantes a Henrique Facuriella (Blimea, 1980), publicó anguaño’l so primer poemariu, El centinela (Saltadera), un llibru que representa un viaxe onde la fuercia motriz ye’l deséu y les estaciones, les persones, los alcuentros físicos y les distancies emocionales con esos otros que representen el suañu y la promesa pero tamién la decepción.

Be the first to comment

Leave a Reply

Tu dirección de correo no será publicada.


*