Büyük Ev Ablukada, los reis del rock alternativu turcu presenten el primer vidiuclip

Büyük Ev Ablukada.
Büyük Ev Ablukada.

El grupu turcu Büyük Ev Ablukada (el nome ye asina por un poema de Turgut Uyar, y vien a traducise «casona bloqueda») presentó’l videuclip del cantar «Hepsine ne fena» del discu FIRTINAYT, seguramente el discu más sonáu nel añu 2017 en Turquía.

Büyük Ev Ablukada son ocho componentes (de dalgunos nun se sabe’l nome de verdá y usen nomatu), tán n’Estambul y lleven tocando dende hai diez años. Fixéronse famosos mui rápido pol tipu de conciertos que dan. Tienen un puntu d’alloriaos que se ve tamién nes lletres onde xueguen al descaru y a provocar. Los ritmos qu’usen son pegadizos y consiguen que la xente se dexe llevar y baille. Nesti últimu discu métense más pa lo electrónico, buscando una sonoridá nueva.

Nel videu, que tien una planificación de planos bien pensada, el cantante lleva tol pesu de manera mui llamativa, pa llevar a la xente a una fiesta. Al final, el trabayu d’ilustración que lu ciarra ye mui frescu y finu.

Büyük Ev Ablukada van al marxe del sistema tradicional de la industria musical. Empezaron colingando canciones n’internet, fixéronse famosos, depués llegaron los conciertos y too lo anuncien y lo difunden dende la páxina web propia.

 

Be the first to comment

Leave a Reply

Tu dirección de correo no será publicada.


*