James Turrell, l’artista de la lluz y del espaciu

James Turrell.
James Turrell.

L’artista de los Estaos Uníos James Turrel lleva más de cincuenta años trabayando cola lluz y l’espaciu pa crear obres qu’enguedeyen a los espectadores colos llinderos y les trampes de la vista humana. Turrell, como pilotu, tien a les espaldes más de doce mil hores de vuelu y, pa él, el cielu ye l’estudiu onde trabaya, el material y el llenzu. Les obres que fai son lluz puro. La lluz proyectao paez que fai muries o barreres. Nuna esquina ye quién a crear formes en tres dimensiones. Los colores son vivos y macizos o améstense d’una manera progresiva ensin fronteres.

James Turrell tamién fai hologrames, pero diferentes de los más comunes porque los d’él nun representen un oxetu, los d’él representen la lluz mesma. Cola palabra alemana Ganzfeld –qu’usen los alemanes pa describir la falta total de sensación de fondura nun sitiu o planu–, Turrell bautiza una serie d’obres nes que consigue facer eso, perder a les persones nun planu o blancu ensin perspectives de planos diferentes. Amás de con proyectores de lluz, l’artista tamién trabaya con pantalles de LED que programa pa que los colores cambien, pero despacísimo, igual durante hores.

Turrell tien obra espuesto en munchos países, sobremanera nos Estaos Uníos. Pa él, el trabayu que fai «nun tien oxetu nengunu, nin imaxe, nin enfoque. Ensin oxetu, ensin imaxe y ensin enfoque, ¿qué ye lo que mires? Tas mirándote a ti mirando.» Lo importante pa esti artista ye crear una esperiencia de pensamientu pero ensin palabres. La guapura y lo diferente puede vese nes semeyes de les obres d’él y puede vivise visitándoles.

Be the first to comment

Leave a Reply

Tu dirección de correo no será publicada.


*