Damián Barreiro gana’l Premiu Fuertes Acevedo con un ensayu sobre’l pesu del audiovisual na construcción d’una identidá

Damián Barreiro.
Damián Barreiro.

El periodista y escritor Damian Barreiro ye’l ganador la XXIV edición del Premiu Máximo Fuertes Acevedo de ensayu en llingua asturiana gracies a la obra Asturploitation, onde fai un repasu al papel del cine y la televisión na construcción de les identidaes nacionales tanto nel Estáu español –onde estudia la propia identidá española, pero tamién les de les nacionalidaes con llingua propia– como nel escenariu internacional, onde posa especialmente nel casu de los Estaos Uníos, India o Israel, como exemplu d’estaos nuevos qu’hubieron de contase a sí mesmos quién yeren.

Dientro de los Estaos Uníos, tien muncha importancia, amás, les producciones destinaes a la comunidá afroamericana nunos años –les décades de los 60 y 70– nos qu’esti colectivu taba lluchando escontra les lleis de segregación racial y necesitaba afirmar la so identidá –los sos oríxenes, la so situación presente y qué queríen ser nel futuru–. Esti exemplu val-y a Barreiro pa tratar tamién el casu del audiovisual asturianu –y, sobre manera, el que s’espresa en llingua asturiana–, de manera que, encontáu nos casos d’éxitu d’otros países, va esponiendo los pasos necesarios «p’afitar los pegollos d’una industria audiovisual asturiana que fora un preséu p’articular el país; pa construir la nuestra memoria colectiva y buscar espacios comunes que compartir».

«Asturies nun pue dexar de llau la importancia del sector audiovisual nel so procesu de reconstrucción identitaria y, muncho menos, les oportunidades qu’ufre pa la normalización y normativización llingüística. Nun podemos ser namás un decoráu natural onde les productores madrilanes y catalanes vengan rodar. La ficción tien que reflexar la nuestra forma de vida y ayudar a preservar la identidá del territoriu al que se dirixe y énte’l que respuende. Los asturianos tienen que poder ver reflexada la so cotidianidá na pantalla, si non, tamos condenaos a desaparecer como pueblu. Y ye que l’apartheid llingüísticu nel que vivimos tamién tien el so reflexu nel sector audiovisual.», puede lleese nes conclusiones del ensayu.

El xuráu –que presidió’l director xeneral de Planificación Lingüística y Normalización, Fernando Padilla, y que formaron los escritores Xuan Santori, ganador de la edición pasada, y Marta Mori; la profesora de la Facultad de Filosofía y Lletres Cristina Valdés, y los filólogos del Serviciu de Normalización Lingüística y Normalización Xosé Miguel Suárez y Luis Casteleiro– consideró que la obra de Barreiro –presentada col seudónimu Muxidora Brown– yera merecedora del premiu «pola relevancia social del tema tratáu y la propuesta estratéxica que fai pal impulsu del sector audiovisual en llingua asturiana, documentáu con procuru y rigor».

Damián Barreiro Maceiras (A Estrada, Pontevedra, 1984) ye periodista y, como tal, trabayó n’Asturies.com, el selmanariu Les Noticies y en TLG, amás de collaborar col periódicu Diagonal Asturies, La Nueva España y otros medios de comunicación asturianos, tal como la revista lliteraria Brixel. Actualmente trabaya na axencia de noticies Europa Press. Tien publicao los llibros L’espeyu onde miranos (Premiu d’Ensayu Fierro Botas), Caleya Sésamu (Premiu Máximo Fuertes Acevedo d’Ensayu) y Yo, la to llingua, onde da voz a la propia llingua asturiana pa que cuente, en primer persona, el so pasáu, presente y perspectives de futuru, nun rellatu qu’abarca más de mil años d’historia.

Be the first to comment

Leave a Reply

Tu dirección de correo no será publicada.


*