El Colexu d’Arquitectos convoca los premios Asturias d’arquitectura pa resaltar trabayos exemplares fechos nel nuestru país. Anguaño ún de los accésit foi pa una casa independiente, de planta y pisu, que lleva la firma de José Ángel Vior Alonso. Los amos de la casa diéron-y l’encargu de que fuera una vivienda pa vacaciones, con güecos grandes y ensin divisiones, y que s’adaptare al presupuestu que teníen ensin pasase. Pal diseñu y pa la estética l’arquitectu tuvo tola llibertá creativa.
La propuesta, que se convirtió nuna realidá nel conceyu de Tapia, potenció y dio valor al sistema de construcción. Asina que l’homigón de les columnes y les viguetes de fierro del teyáu quedaron vistes. El corredor del primer pisu tien un cierre d’alambre de gallineru y delles parés tan revestíes de tableros de madera aglomerao. Habitaciones amplies con too a la vista, y unos elementos constructivos reducíos a la mínima espresión porque, pa tener una casina, colo imprescindible basta. Igual esi ye’l minimalismu de verdá. Consumir menos, contaminar menos y disfrutar más.
Leave a Reply