El compromisu que ye arte y ye xestu

Luis Feás, comisariu de la Muestra d’Artes Plástiques del Principáu d’Asturies (MAPPA), reconoz –nel católogu de la esposición que puede vese nel Antiguu Institutu de Xixón hasta’l 15 de xunetu– que «nun ye fácil atopar un denominador común que dea sentíu y unidá a la muestra». Instalaciones, pintures, grabaos, dibuxos, vídeos, acciones y semeyes de siete artistes bien formaos y dispuestos a arriesgar dan conteníu a un certame que llega a la 28.ª edición, entamáu pol Gobiernu asturianu. Los qu’escoyeron a los artistes pa esta colectiva fueron, amás del propiu Feás, Lydia Santamarina, Bea Villamarín, Patricia Villanueva y Jaime Luis Martín.

Miguel Braceli (Valencia, Venezuela, 1983), ye un artista visual y arquitectu al que-y presta facer proyectos colectivos y n’andecha. La mayor parte de les obres d’él son efímeres y de formatu grande y suel faceles n’espacios comunales, unes obres Poles que tien llevao munchos premios y reconocimientos internacionales. Na Muestra d’Artes Plástiques del Principaú d’Asturies enseña les semeyes y el videu de la so intervención Sacar la mar, que fixo na playa San Llorienzo de Xixón, nel añu 2016. Esta obra forma parte de la serie Apoloxíes de lo posible, Actu II y fíxose con una banda de polietileno de 100 metros de llargor y cola andecha de 30 persones. Una metáfora del esfuerciu colectivu en tensión de fuercies cola naturaleza.

Tania Blanco (Uviéu, 1987) depués de llicenciase en Belles Artes decidió siguir la formación nel mundu de la estampación. Nel 2016 punxo taller de grabáu propiu. Lleva un par d’años esponiendo en delles feries, festivales y esposiciones nacionales y internacionales los resultaos de les sos investigaciones colos grabaos. Na MAPPA enseña obra gráfica fecha en soportes y técniques diferentes, como la impresión dixital en papel cebolla, la matriz xilográfica de corte láser o la xilografía y litografía en papel Fabriano. Na llinia creativa, los motivos de los grabaos d’ella nacen de les llinies y volumes de la papiroflexia. Un xuegu ricu de capes, dobleces, presiones y testures.

Covadonga Casado (Uviéu, 1994) ta graduada en Belles Artes y tien un master n’Arte y Ciencia del Vidru. Tanto la formación como la divulgación de la obra d’esta artista ye internacional. Na MAPPA presenta tres obres de carboncillo, llapiceru conté y acuarela papel nes que, mandándose del blanco y negro con dellos visos en mariello, representa tres muyeres desnudes que destaquen por tener más pesu de la cuenta. Na otra obra qu’enseña, un trípticu, les games cromátiques son les mesmes y los materiales de trabayu tamién pero, anque la figura femenina sigue siendo la protagonista, nesti casu hai otra intencionalidá nos movimientos y posiciones de los cuerpos y les manches marielles centrénse nel perímetru de les manes o de la cara, lo que fai que garren un significáu simbólicu munchu mayor.

Mariana Heredia (Xixón, 1988) ye una artista formada n’España y n’Alemaña que desencolca’l so llabor artísticu nel formatu audiovisual y de les instalaciones. Tien espuesto n’eventos europeos y d’América del sur. Na MAPPA presenta enriba d’una mesa asimétrica delles caxigalines qu’atopa (plásticos, pieces ferruñoses, ocle, cachos de cerámica, cachinos d’un cedé, galipote, cinta aislante, papel d’aluminiu…), con un monitor qu’emite imaxes y vídeos dixitales. L’interés de la obra ye facer un tantéu de la realidá onde les capes de significáu van mecíes unes per otres.

Noemí Iglesias (Llangréu, 1987) ye una artista con formación en Belles Artes que complementó en dellos paises de tol mundu na rama de la cerámica. Vivió en Grecia, n’Inglaterra, n’Hungría y, agora, vive y trabaya en Taiwan. El trabayu artísticu d’Iglesias ta centráu en trabayos performativos de muncha duración. Na MAPPA enseña un videu performance de venti minutos onde va arrincando los pétalos a margarites de porzolana blanques. Les manes de l’artista que se mueven mui vives casquen la porzolana, que fai un ruíu mui particular al romper. La obra quier ser una crítica a la mercantilización del namoramientu.

Rodrigo Martín (Llangréu, 1986) inspírase en sensaciones cromátiques pa crear un trabayu plásticu que, del tarrén de la pintura expresionista abstracta, avanza hacia formes cercanes a elementos escultóricos tridimensionales; xeometría y xestu na mesma representación. Na MAPPA cuelga teles pintaes con pitura acrílico, onde’l negro y el mariello o’l negro y el verde se delimiten en formes xeométriques, unes veces cola testura presente y otres non.

Mario Martínez (Xixón, 1988) ye grabador y trabaya tamién la estampación. Profesionalmente camina ente la ilustración, el diseñu y la serigrafía. Como artista, na MAPPA, colinga una serie de cuatro xilografíes en papel en blanco y negro onde’l pensamientu y el ser comparten el protagonismu. Les obres son una crítica a comportamientos personales poco positivos que condicionen la vida.

La esposición ta documentada nun catálogu editáu en cuatro idiomes (asturianu, castellanu, inglés y francés).

Be the first to comment

Leave a Reply

Tu dirección de correo no será publicada.


*