Ródchenko: l’estudiu d’una manera nueva de mirar

Aleksandr Ródchenko en 1935.
Aleksandr Ródchenko en 1935.

Aleksandr Ródchenko (San Petersburgo, 1891 – Moscú, 1956) foi pintor, escultor, diseñador gráficu y fotógrafu. Casó con Varvara Stepánova, que tamién yera artista y fundó una estructura que, nos tiempos d’él, yera una novedá grande y qu’agora conocemos como axencia de publicidá. Ye ún de los padres del constructivismu. El constructivismu rusu entendía l’artista como un inxenieru de lo visual. Esti movimientu artísticu que nació en 1914 garró fuercia depués de la revolución bolchevique.

Dende va años ye normal nos medios de comunicación, y agora nes redes sociales –tol mundu conoz los memes famosos–, pero Ródchenko foi de los primeros n’esplorar el fotomontaxe nel cartelismo y nes cubiertes de los llibros como alternativa al dibuxu y la pintura. La creatividá y el querer facer montaxes cada vez más diferentes llevólu a facese fotógrafu él tamién. Nesti campu descubrió la fuercia de les semeyes pa facer pensar, pa desconcertar al públicu y p’aporfiar más nel compromisu social de les imaxes. Les semeyes que más facía y usaba yeren les que sacaba con planos dende’l cielu al suelu o al revés, del suelu al cielu, simpre col oxetivu perpendicular al tarrén. Con estes maneres de retratar lliberó a la fotografía de los convencionalismos y revolucionó los puntos de vista descolocando a los receptores de los sos trabayos. La gran baza que tuvo pa ser quién a sacar les fotos d’esta manera foi la cámara Leica, que yera mui amañosa pa componer esti tipu de planos rompedores. De la mano de Ródchenko nació’l constructivismu fotográficu.

La esposición que dedica a esti diseñador gráficu rusu l’Institut Valencià d’Art Modern, IVAM, trata d’enseñar les aportaciones radicales que fixo a la fotografía y a la producción gráfica editorial y publicitaria, amosando al públicu llibros, revistes y semeyes que fixeron tanto Ródchenko como otros artistes que lu siguieron na llinia estética, como Klucis, Mayakovsky o Varvara Stepánova. El comisariu de la muestra, que puede vese hastal 26 d’agostu, ye Joan Ramón Escrivá.

El muséu ufre, al traviés d’internet, una visita audiovisual a la esposición y accesu al catálogu.

Casu d’estudiu: Ródchenko
Institut Valencià d’Art Modern (IVAM)
Hasta’l 26 d’agostu

Be the first to comment

Leave a Reply

Tu dirección de correo no será publicada.


*