El machismu vistu por homes

Si s’arranca dende la idea de que’l xéneru ye una construcción social y cultural, y que los papeles de los paisanos y de les muyeres son aprendíos, nun ye difícil dase cuenta de qu’a ser un home, muyer, neñu o neña apriéndese. D’esa manera tamién s’apriende’l sitiu onde tien que tar caún na sociedá. Entre cero y menos uno, ye un documental que trata’l tema de la desigualdá de xéneros dende la masculinidá.

Los patrones de comportamientu de poder son una herencia de la cultura y la educación. Pa los productores d’Entre cero y menos uno ye necesario enseñar otres masculinidaes, les que tán silenciaes, les que nun rescamplen o se fraden dafechu pero que son les que quieren romper col modelu de masculinidá d’anguaño y faen por llevantar formes nueves d’homes más diferentes, fuera del modelu patriarcal.

Esti curtíu documental da la voz a los paisanos que callen los sos argumentos, que nun entren n’acción y nun reaccionen denunciando la desigualdá. ¿Y por qué pasa eso? Pola falta de concienciación, por desconocimientu y, a veces, por mieu. Mieu a que nun los vean «bastante homes» por defender idees que nun sofiten l’heteropatriarcáu, mieu a que se cuestione la preferencia sexual d’ellos y mieu a quedar solos y aparatos nel círculu social.

Dende Medra Psicología, la productora del curtiumetraxe, creen a pie firme nel cambiu personal y social. Y en que ye necesario dar voz y enseñar otros modelos de ser paisanu porque, faciéndolos mayoritarios, vamos consiguir caminar p’hacia una sociedá más xusta y igual. Cola edición d’Entre cero y menos uno –dirixíu por Constantino Menéndez–, Medra Psicología apuntóse al Pactu Social contra la Violencia sobres les Muyeres del Gobiernu del Principáu d’Asturies, del Institutu Asturianu de la Muyer.

 

Be the first to comment

Leave a Reply

Tu dirección de correo no será publicada.


*