L’Asturies de 1925 que retrató Ruth Matilda Anderson

Mercando xarros de Ḷḷamas del Mouro (Cangas), Ruth Matilda Anderson.
Mercando xarros de Ḷḷamas del Mouro (Cangas), Ruth Matilda Anderson.

ALBERTO SUÁREZ
N’Asturies, nel 1925 gobernaben los militares. El xeneral Primo de Rivera diera un guelpe d’estáu n’España y, col parabién del rei Borbón Alfonso XIII, instauró una dictadura dende’l 1923 hasta’l 1930. Quedaron prohibíos tolos idiomes que nun fueren el castellanu, acabáronse les elecciones y les Cortes y los gobiernos colexaos: la democracia. El poder foi absolutu nesi periodu y el programa políticu foi profascista, nacionalista español y católicu.

Nesi añu de 1925 llegó a Asturies la fotógrafa de los Estaos Uníos Ruth Matilda Anderson (1893-1983). Mandóla la Hispanic Society of America, Muséu y Biblioteca, entidá que fundara’l multimillonariu y filátropu Archer Milton Huntington y pa la que trabayaba Ruth faciendo retratos. Huntington yera un enamoráu de la cultura española y invirtió’l patrimoniu en llevantar un muséu «pa facer por estudiar les llingües, la lliteratura y la historia española y portuguesa». El benefactor, que tuvo delles veces n’España a finales del sieglu XIX, dióse cuenta de que la formación erudita que tenía sobre la cultura hispánica nun lu llenaba y que lo que lu facía de verdá descubrir l’alma ibérica yera’l tratu con xente de tolos estamentos sociales y, sobre manera, cola la xente de pueblu. L’americanu decatóse tamién de que la fotografía yera una preba documental fundamental pa consiguir los fines que buscaba y corrió colos gastos del trabayu de Ruth Matilda Anderson en dellos viaxes a Asturies, Galicia, Castiella, Estremadura y Andalucía.

Rapaza canguesa, Ruth Matilda Anderson.
Rapaza canguesa, Ruth Matilda Anderson.

Anderson fizo n’Asturies dalgo más de mil semeyes. Anduvo pel centru, l’oriente y l’occidente del país. Retrato homes y, sobre manera, muyeres en mercaos, feries, quintanes y cases d’Uviéu, Xixón, Avilés, As Figueiras, Cangas, Tinéu, Pravia, Salas, Cuideiru, Nava, Villaviciosa, Ḷḷena, Cangues, Llanes… La calidá de les semeyes de la fotógrafa americana ye escepcional dende un puntu de vista artísticu, y la cantidá d’información qu’enseñen de la vida en 1925 dende un puntu de vista etnográficu ye impresionante.

Gracies a les semeyes d’Anderson colingaes na esposición Hallazgo de lo Ignorado. Fotografías de Asturias de Ruth M. Anderson para la Hispanic Society of America, 1925, nel Antiguu Institutu de Xixón, podemos ver cómo yera’l pan daquella o qué fatos llevaben los pixuetos a la mar. Sabemos que les muyeres de les clases populares de les ciudaes y les aldeanes que baxaben a les villes cambiaren el dengue polos mantos de merino, de palma o poles toquilles de llana. Qu’unes ataben el pañuelu tovía a l’asturiana o a la canguesa colos picos arriba o de llau y otres ya lu llevaben amarráu en cazu. Y que los homes gastaben boina, bien calada, yá en tol territoriu.

Les semeyes maraviyoses d’esta fotógrafa enséñennos les tabiernes –sitiu de parada pa los paisanos– y los palacios de los señorones, tamién les cocines de los campesinos, de los marineros y de los nobles. Y siempre con gran calidá y definición nos detalles. Vemos los entretenimientos de la xente cuando nun trabayaba, xugando a les cartes o a la llotería. Si miramos bien, vemos a los mayores y a la xente menudo calzao de madreñes, de botes, de zapatos, de corices, d’escarpinos… Estes semeyes que sacó Ruth Matilde –guapísimes toes– dícennos que les pites que se vendíen nos mecaos de Cangas o de Cangues yeren franciscanes y que, pel antoroxu, n’Uviéu había vendedores de plumeros.

Fotógrafa de romería, Ruth Matilda Anderson.
Fotógrafa de romería, Ruth Matilda Anderson.

Dalgunos retratos d’esta esposición tienen una fuercia d’obra maestra, como esi home que nos mira delantre d’un comerciu d’albardes, o eses dos muyeres que tán tratando unos perendengues nel rastru. Impresionante ye la fachenda, la mirada y la calidá del retratu d’una muyer de Cangas nel mercáu con dos pites na mano. Y ye que sí, les muyeres –por suerte– tán mui retrataes na mirada d’Anderson. De muyer a muyer, l’americana captó la complicidá de les asturianes. Y documentó dende toles pieces del traxe tradicional hasta los oficios y trabayos que teníen y facíen. Hasta tuvo’l detalle de retratar una compañera fotógrafa de romería.

Tamién retrata Ruth Matilda palacios, pero tien más interés nos carromatos y carros del país, nos llavaderos (incluida la fonte Foncalada de la capital), na cacía y xarros de barru de Ḷḷamas del Mouro, nos tipos de madreñes, etc. De manera clara, el protagonista d’esti trabayu ye’l pueblu.

Anderson yera asemeyadora profesional de la Hispanic Society y taba diplomada por una prestixosa escuela de Nueva York. Ella aprendiere de bien nueva l’oficiu del padre, que yera retratista tamién. La esposición de Xixón, con casi doscientes semeyes, tien la virtú de descubrir pela primer vez la so obra –importantísima pa documentar la historia d’Asturies– y val pa que la conozamos y valoremos como documentalista y como artista. Pero’l gociu que da ver esos doscientos positivos fai al visitante naguar por ver los ochocientos que nunca s’enseñaron nel nuestru país. Un patrimoniu únicu pa entender cómo fueron los años venti n’Asturies y pa danos cuenta de lo poco que cambiaron les condiciones de vida, en bien de sitios del nuestru país, hasta los años setenta del sieglu XX.

La muestra va acompañada con un catalógu onde se publiquen una selección d’obres, y, siendo una de les meyores que se fixeron sobre Asturies, escaez de manera vergonzosa la llingua del pueblu que retrata. Nin la toponimia oficial se respeta nes cartelines que clasifiquen y detallen cada foto. Por desgracia, otra vez más, la difusión del patrimoniu cultural asturianu mutila les llingües propies, tal paez que tuvieren prohibíes, como en 1925.
La esposición entámala The Hispanic Society of America en collaboración col Muséu del Pueblu d’Asturies y el Muséu Casa Natal de Xovellanos de la Fundación Municipal de Cultura, Educación y Universidá Popular de Xixón y puede vese hasta’l 21 d’ochobre.

 

Ruth Matilda Anderson en Salas, 1925.
Ruth Matilda Anderson en Salas, 1925.

Hallazgo de lo Ignorado. Fotografías de Asturias de Ruth M. Anderson para la Hispanic Society of America, 1925
Centru de Cultura Antiguu Institutu, Xixón
Hasta’l 21 d’ochobre

1 Comment on L’Asturies de 1925 que retrató Ruth Matilda Anderson

Leave a Reply

Tu dirección de correo no será publicada.


*