El Muséu de Belles Artes recupera pela primer vez nuna muestra a los artistes que fixeron viñetes pa la ‘Revista de Occidente’

Tertulia de 'Revista de Occidente', 1927. Archivo Fundación Ortega y Gasset-Gregorio Marañón.
Tertulia de ‘Revista de Occidente’, 1927. Archivo Fundación Ortega y Gasset-Gregorio Marañón.

Son más de 128 obres les destacaes na esposición Trazos de la Palabra. Viñetas de ‘Revista de Occidente’, una escoyeta que fixo’l director del Muséu de Belles Artes d’Asturies, Alfonso Palacio, d’ente les qu’ilustraron los ochocientos númberos llargos que se lleven publicaos d’esta cabecera que lleva 95 años de vida. Fundada en 1923 por José Ortega y Gasset –nuna etapa de la historia española de falta de llibertá y baxo un sistema políticu dictarorial impuestu pol xeneral Primo de Rivera–, nunes condiciones perdifíciles, la revista consiguió abrir los llinderos del pensamientu español y difundir idees modernes y vanguardistes de pensadores y creadores españoles, europeos y americanos nuna dómina na que la tasa d’analfabetismu yera del ochenta por cientu. Revista de Occidente foi una publicación valiente que nació pa dar a conocer a los creadores nuevos, los que depués se clasificaron na xeneración del 14 o del 27, y esa xera foi difícil porque’l sistema cultural yera mui inmovilista. Nel apartáu artísticu, les viñetes encargáronles a los artistes de les vanguardies creatives.

La muestra, allugada nel Edificiu de l’Ampliación del Muséu de Belles Artes d’Asturies (Planta -1), ta dividida en tres estayes, caúna dedicada a una etapa de la revista, cola fin de perfilar lo que foi’l panorama artísticu de cada dómina.

Vista de la esposición.
Vista de la esposición.

Nesti sen, a lo primero de la revista (1923-1936), la etapa cuando l’asturianu Fernando G. Vela fixo un papel perimportante como secretariu de redacción, ilustraron les portaes y les páxines interiores dellos de los meyores representantes del Arte Nuevo, como José de Almada Negreiros, Rafael Barradas, Gabriel García Maroto, Wladyslaw Jahl, Maruja Mallo, Santiago Ontañón, Benjamín Palencia, Carlos Sáenz de Tejada y José María de Ucelay. Yá pal segundu períodu (1963-1975), baxo la dirección de José Ortega Spottorno, lo que rellumó la publicicaión foi’l trabayu de los renovadores de les artes plástiques españoles a partir de l’acción de los informalistes, con nomes perconocíos como los de Rafael Canogar, Eduardo Chillida, Pablo Palazuelo, Manuel Rivera, Antonio Saura o Eusebio Sempere, ente más otros. Pa rematar, nos tiempos más recientes, na etapa qu’empezó en 1980 baxo la tutela de Soledad Ortega, volvió dase protagonismu a las viñetes na Revista de Occidente, encargándoles a artistes de xeneraciones diferentes pero tan famosos como Ramón Gaya, José Guerrero, Antoni Tàpies, Fernando Zóbel, Pablo Serrano, Eduardo Arroyo, Darío Villalba, Rogelio López Cuenca, Guillermo Pérez Villalta, Alfonso Albacete, Carlos Alcolea, Manolo Quejido, Soledad Sevilla, Carlos León, Darío Urzay, Mateo Maté, Eulalia Valldosera, Enrique Marty o Chechu Álava.

La muestra va complementase con una visita guiada pa públicu adultu’l miércoles 25 de xunetu a les 18:30 hores. N’ochobre, el xueves 11 va facese la Conferencia Revista de Occidente Las industrias culturales de Ortega, por cuenta de Fernando Rodríguez Lafuente y, al otru xueves, el 18 pero a les 19 hores, el conferenciante va ser Alfonso Palacio y va tratar la rellación ente Revista de Occidente y l’arte.

Trazos de la Palabra. Viñetas de ‘Revista de Occidente’, entámenla la Fundación José Ortega y Gasset-Gregorio Marañón y el Muséu de Belles Artes d’Asturies, y contó cola collaboración de la Fundación Banc Sabadell.

Trazos de la Palabra. Viñetas de ‘Revista de Occidente’
Muséu de Belles Artes d’Asturies
Edificiu de l’Ampliación, Planta -1
Hasta’l 28 d’ochobre

Be the first to comment

Leave a Reply

Tu dirección de correo no será publicada.


*