Obres de primerísimu nivel de Braque y Picasso integren la muestra ‘Grandes figures de la Vanguardia’ nel Belles Artes, n’Uviéu

‘Atelier VIII’ (detalle), de Georges Braque, una de les obres que se puede ver na muestra.
‘Atelier VIII’ (detalle), de Georges Braque, una de les obres que se puede ver na muestra.

Lo que diba acabar siendo l’arte del sieglu XX nun se diba poder entender ensin la llegada de les primeres vanguardies. Enmarcaes nelles destacaron dellos referentes individuales, como Pablo Picasso y Georges Braque, que nos años primeros del sieglu XX allumaron el Cubismu, un puntu verdaderu d’inflexón na historia del arte y en cómo se viniere entendiendo la creación dende’l Renacimientu. A ellos dos, y a la investigación cubista, xuntáronse otros dos artistes españoles de altor grande, como resultaron Juan Gris y María Blanchard. Los cuatro tán presentes na esposición Grandes figures de la Vanguardia, que ta abierta nel Muséu de Belles Artes d’Asturies.

D’igual manera, la fuercia, fantasía y dimensión rompedora d’otru de los grandes ismos de primeros del sieglu pasáu, el Surrealismu, ta condensada nes obres d’otros dos grandes creadores internacionales españoles, tamién presentes na muestra: Joan Miró y Salvador Dalí.

Toles obres que s’enseñen nesta esposición tienen un puntu en común, axuntase gracies a l’afición pol arte y el coleccionismu de la familia Masaveu, una raza d’empresarios catalanes qu’emigraron p’Asturies nel 1840. La metá de les pintures d’esta esposición lleguen al Muséu de Belles Artes cedíes pola dueña de la Colección Masaveu, que ye la corporación empresarial (cementos, inmuebles, bebides, etc) del mesmu apellíu, auque la xestión ta encomendada a la Fundación María Cristina Masaveu Peterson.

La Masaveu ye una colección que tien ún de los fondos artísticos privaos más importantes d’España, con más de 1.500 pieces qu’abarquen dende la Edá Media hasta l’arte actual. A lo llargo de los años, la colección tuvo dellos impulsores, que fueron comprando pintures escepcionales de la que recuperaben pieces clave pal patrimoniu espa­ñol, d’esta manera, fueron faciéndose con obres maestres d’autores importantes y ampliando, cronolóxicamente, los llinderos de la colección hasta la contemporanei­dá. D’esi interés por ameyorar el fondu llegaron pa esi conxuntu obres espuestes nesta muestra del arte de vanguardia que se puede ver agora nel Muséu de Belles Artes d’Asturies, como Tête (Personnage) y Tête de femme (Jacqueline) de Pablo Picasso; Le violon, de Juan Gris, y Atelier VIII, de Georges Braque.

A parte d’esa colección, y de manera paralela, Pedro Masaveu Peterson foi comprando obres pa una colección personal d’él, estremada de la familiar y identificada col so nome. Cuatro de les pieces espuestes en Grandes figures de la Vanguardia salen d’esti fondu: Mousquetaire à l’épée et amour, de Pablo Picasso; Nature morte, de María Blanchard; La Grande Écaillère, de Joan Miró, y Metamorfosis de ángeles en mariposa, de Salvador Dalí. Dende 1994, estes cuatro obres son patrimoniu de tolos asturianos desque pagaren con elles (y con otres cuatrocientes) los impuestos hereditarios a la muerte del coleccionista.

Grandes figures de la Vanguardia
Muséu de Belles Artes d’Asturies
Colección Masaveu y Colección Pedro Masaveu
Hasta’l 5 de xineru del 2019

Be the first to comment

Leave a Reply

Tu dirección de correo no será publicada.


*