Estancies Coreográfiques: Baillar, sentir y esperimentar

Estancies Coreográfiques. Sesión de trabayu.

ALBERTO SUÁREZ
Estancies Coreográfiques ye una iniciativa única, qu’axunta n’Uviéu a 44 profesionales de la danza contemporánea española, pa esperimentar y reflexonar col movimientu y los sones. La edición d’anguaño d’esti llaboratoriu, la sesta yá, ta dedicada a la tradición y a la innovación nel campu del baille coreografiao y la música. Les estancies son un momentu de convivencia y conocimiento que valen pa encaminar les carreres de los profesionales que participen, pa conocese ente ellos y pa conocer tamién, más a fondo, la música y el baille tradicional, el flamencu y la rellación cola danza moderno.

En palabres de Yoshua Cienfuegos, el director d’esti alcuentru, les estancies «son un estímulu p’abrir puertes creatives». El procesu lleva meses de trabayu, dende que s’entama tol programa y s’escueyen los participantes hasta que se convierte nun llibru con toles conclusiones de la convivencia de quince díis, n’Uviéu. Les sesiones de trabayu son dures, con munches hores d’espresión performativa –desendolcada ente instrumentistes, coreógrafos y bailladores–, y nelles trece investigadores van recoyendo datos con ferramientes diferentes (cuestionarios, narratives d’iniciu y de final de la esperiencia, observaciones visuales, semeyes, grabaciones audiovisuales, etc.) pa documentar el procesu que se ta esperimentando en cada sala. La encargada de coordinar la recoyida de toa esa tresmisión plástica ye la investigadora Leticia Ñeco.

Estancies Coreográfiques. Sesión de trabayu.Estancies Coreográfiques tien esti añu dellos especialistes nel elencu, como los espertos en flamencu Marcos Flores y Juan Carlos Lérida, el director del Ballet Folclóricu de Madrid, Jorge García Ávila, o César Casares. Representando la tradición cultural d’otros territorios, como l’asturianu, ta presente Jesús Rivero. Pa Yoshua Cienfuegos, ye importante qu’haya nes xornaes que dirixe una representación bona de la música tradicional asturiana, un tocador y baillador cola mente abierta a la esperimentación, como ye Jesús Rivero, que, amás d’en baille tradicional asturianu, tamién ye espertu n’otros tipos de baille. Pa Cienfuegos, la música y el baille tradicional puen ser una fonte d’esperimentación fundamental pa la danza contemporánea y pon como exemplu a Kukai dantza, que llevaron el premiu nacional de danza d’España con una creación nueva a partir de la danza tradicional vasca.

El día nueve d’agostu, el Teatru Campoamor va tar abiertu al públicu pa que puedan ver el resultáu d’una de les sesiones de trabayu en directo de les Estancies Coreográfiques.

Be the first to comment

Leave a Reply

Tu dirección de correo no será publicada.


*