‘Inmoderatus’: Crear conciencia más allá de la estética

El Muséu Barjola presenta Inmoderatus un proyectu enllenu de simbolismu qu’anduvo dellos años rodando per delles ciudaes y que yá diz dende’l títulu que trata de la inmoderación. Lo que quier esta esposición, que va poder vese en Xixón hasta’l 28 d’agostu, ye dexar que salgan los sentimientos y imaxes que son quién a ver perspectives que quieren falar de la memoria, el contestu y l’acción, ente otres coses, y que trabayen cola naturaleza y la rellación de la persona con ella.

N’Inmoderatus presenten obres les artistes asturianes Elisa Torreira y Isabel Cuadrado y tamién la sevillana Tonia Trujillo y la nuevayorquina Kae Newconb, trabayos que tienen como elementu común cuestionar lo que tenemos como establecío y llevantar significaos nuevos y crear conciencia más p’alla de la estética, anque ensin arrenunciar a la guapura. Falando caúna llinguaxes artísticos múltiples, axunten les voces pa tresmitir inquietú, de la que desafíen los llinderos con obres de técnica diferente: instalación, fotografía, dibuxu, vídiu y performance. Caúna trabayó por cuenta d’ella nel taller en delles pieces pero’l resultáu de sumar les obres de toes da una obra en conxunto con posu conceptual.

Tonia Trujillo, nel proxectu d’ella («Cruzar la llínia»), escarba nel papel del arte como constructor y cuestionador de la conciencia social. La obra d’ella trata d’allumar la manipulación a la que nos somete’l poder colo que «nun se ve» y sobre lo importante que ye tener un conocimientu propiu de los acontecimientos.

Elisa Torreira, nel trabayu d’ella («Esperando la marea»), plantea la necesidá de despertar a l’acción en convivencia coles coses pequeñines y colos materiales probinos, de la qu’intenta facer una dicotomía ente la construcción y la destrucción. Ye un proyectu qu’arrastra tesoros de naufragaos a la nuestra oriella faciendo de les coses poesía.

Isabel Cuadrado, na obra «Traces», interésase pola la memoria y la desapaición por cuenta de les marques de los preseos y ferramientes d’un muséu etnográficu. La obra ta fecha en collaboración col Muséu del Pueblu d’Asturies. Esti proyectu trata de si les coses tienen sentíu o non, de si valen o nun valen.

Kae Newcomb propón n’«El vientu aumenta» una mirada que quier parase a pensar na estroza del mediu ambiente y nos problemes que da eso. La obra d’ella repara nes desigualdaes a les que nos lleven les polítiques económiques nel mundu enteru y quier encamentar a la xente sobre lo necesario que ye defender el patrimoniu natural y a los que dependen d’él pa vivir. Esti proyectu escoyéronlu, amás, pa participar na Biañal Muyeres nes Artes Visuales (MAV).

Inmoderatus
Tonia Trujillo, Elisa Torreira, Isabel Cuadrado, Kae Newcomb.
Muséu Barjola, Xixón.
Hasta’l 26 d’agostu.

Be the first to comment

Leave a Reply

Tu dirección de correo no será publicada.


*