Les fotos censuraes de la Gran Depresión nos Estaos Uníos

Hasta’l 28 d’agostu puede vese na galería cuatro de la Whitechapel de Londres –un centro museísticu d’importancia plena pal arte contemporáneu– la esposición Killed negatives (Negativos mataos). Esta muestra permite recuperar semeyes de los años trenta del sieglu pasáu de la vida los pueblos y caseríes nos Estaos Uníos. Ente l’añu 1935 y el 1944, Roy E. Stryker, que fuere xefe de la División d’Información de l’Alministración de Seguridá Agrícola del país norteamericanu, entamó una idea mui novedosa y que resulto histórica pal mundu de la fotografía, al encargar facer reportaxes de semeyes cola aquel de retratar la probitú na que vivíen los aldeanos depués de la Gran Depresión. Asemeyadores de la categoría de Walker Evans (1903-1975) y Dotothea Lange (1895-1965) fixeron parte de les fotos.

Stryker escoyó los negativos que quería que se conocieren y mandó afuracar los demás, pa que nun valieren y que, al revelalos, siempre saliere un puntu negru flotando nos paisaxes y cares retrataos. Miles de negativos acabaron furaos con esti sistema. La esposición de la Whitechapel enseña parte d’estos retratos positivaos que se refugaren, y tamién rexistra los datos de los fotógrafos que trabayaron nesti proyectu. Amás, la muestra inclúi respuestes d’artistes contemporáneos a estes imaxes tan impactantes. Les semeyes censuraes pasen a tener un puntu d’abstracción, mui conceptual, y tamién a ser estrañes y guapes. En cualquier casu, estes semeyes nunca vistes de los años trenta n’América del norte nun pierden del too la función informativa y documental.

Ente los fotógrafos tán Paul Carter, Jack Delano, Walker Evans, Theodor Jung, Dorothea Lange, Russell Lee, Edwin Locke, Carl Mydans, Arthur Rothstein, Ben Shahn, John Vachon y Marion Post Wolcott, xunto con obres contemporánees d’Etienne Chambaud, Bill McDowell, William E. Jones y Lisa Oppenheim.

 

Be the first to comment

Leave a Reply

Tu dirección de correo no será publicada.


*