La lluz de Sorolla alluma la cúpula del Niemeyer d’Avilés

'Corriendo por la playa', Joaquín Sorolla.
'Corriendo por la playa', Joaquín Sorolla.

Na Cúpula del Centru Niemeyer puede vese la muestra Pedro Masaveu: pasión por Sorolla, hasta’l día 6 de xineru de 2019. La esposición ye pa mayor gloria y homenaxe del empresariu, millonariu y filántropu Pedro Masaveu Peterson porque fainse los venticinco años de que morriera. Escoyéronse pa la muestra obres de Joaquín Sorolla porque foi’l preferíu d’esti cementeru amante y coleccionista d’arte.

Ye la primer vez que toles obres de Sorolla que foi quien a comprar Pedro Massaveu pa la colección d’él y de la familia s’enseñen xuntes, sacante una que ta nel Reina Sofía de Madrid. Los Masaveu son los mayores propietarios d’obres de Sorolla d’España. Con parte d’elles tamién pagaron los impuestos de socesión y agora son de tolos asturianos y formen parte de los fondos del Muséu de Belles Artes d’Asturies. Delles d’eses obres del nuestru muséu nacional tamién van cedíes p’Avilés. Les pintures, que sumen en total cincuenta y nueve obres, toquen munchos temas aunque la mar y la pesca son el de la mayor parte. Como la cúpula nun tien parés afayaíces pa colingar los cuadros, llevantáronse dende’l suelu parés de vidru. La entrada ye pagando.

Pedro Masaveu: pasión por Sorolla
Cúpula del Centru Niemeyer (Avilés)
Hasta’l 6 de xineru del 2019

Be the first to comment

Leave a Reply

Tu dirección de correo no será publicada.


*