La Tertulia Malory celebra’l XX aniversariu con un programa d’actividaes culturales en L’Entregu

Ilustración d'Alfonso Zapico conmemorativa del décimu aniversariu de la Tertulia Malory, nel 2008.
Ilustración d'Alfonso Zapico conmemorativa del décimu aniversariu de la Tertulia Malory, nel 2008.

Xuntase tolos vienres pa falar y debatir de llibros y lliteratura ye lo que vienen faciendo, dende hai yá venti años, los miembros de la Tertulia Malory, qu’aconceya, dende 1998, na cervecería Tom Malory de L’Entregu. Nacida de los talleres lliterarios que diera’l profesor Benigno Delmiro na biblioteca de L’Entregu, esta tertulia foi amestando, col tiempu, voces nueves al grupu inicial, un grupu del que permanecen, fieles a la cita selmanal, nomes como los de los escritores Chechu García y Xulio Arbesú o’l director de teatru Roberto Corte.

Pa conmemorar esti aniversariu, los miembros actuales de la tertulia tienen preparáu un conxuntu d’actividaes que se van desenvolver ente los díes 5 y 7 d’ochobre baxo la denominación común de «Maratón Malory» y que van arrancar el vienres 5, a partir de les cuatro y media de la tarde, con una Tertulia Lliteraria abierta na mesma cervecería Tom Malory. D’ehí, saldráse pa la Casa Cultura de L’Entregu, onde, a les seis de la tarde, va inaugurase la esposición 20 años de Tertulia Malory, onde se van poder ver dibuxos, llibros y otres pieces rellacionaes cola vida de la tertulia, tal como una de les medalles que s’entreguen a los ganadores del Premiu Malory al Meyor Llibru n’Asturianu, que, dende’l 2012, vien concediendo la tertulia. A les ocho y media, la cita va ser otra vuelta na cervecería Tom Malory, onde va principiar una una K-charrada poética con micrófonu abiertu, a la que tán invitaes a participar toles persones que quieran.

El día grande de les celebraciones va ser el sábadu 6 d’ochobre, cuando ta programáu l’espectáculu «Maratón Malory», que va empecipiar a les siete y media de la tarde nel Teatru Municipal de Samartín del Rei Aurelio, también nel llugar de L’Entregu. Esti actu ta concebíu como una gala heteroxénea nos sos conteníos y nella van poder disfrutase dende actuaciones musicales –como les del grupo Nuberu o la coral ¿Y por qué non?– a monólogos teatrales pasando pela proyección de montaxes audiovisuales y dalguna sorpresa qu’otra. Amás, nel actu va presentase’l númberu 5 de la revista Reciella Malory, onde s’inclúin testos de dellos de los nomes más importantes de la lliteratura asturiana contemporánea, como son Xuan Bello, Lourdes Álvarez, Antón García, Vanessa Gutiérrez, Milio Rodríguez Cueto o Consuelo Vega, dalgunos d’ellos, ganadores del premiu que, añalmente, entrega la tertulia.

Los actos conmemorativos del XX aniversariu van acabar el domingu 7 d’ochobre a mediudía, cola convocatoria, a la una de la tarde, d’un Vermú Lliteriariu na cervecería Tom Malory, no que va ser una ocasión escepcional pa comentar los meyores momentos de los díes anteriores y empezar a texer planes pa los años venideros.

Be the first to comment

Leave a Reply

Tu dirección de correo no será publicada.


*