La tradición asturiana y el flamencu del pueblu van protagonizar los XI Alcuentros de Vezos Astures

Reyes León.
Reyes León.

Los Alcuentros cola tradición qu’entama’l Conceyu de Cultura Tradicional Vezos Astures nacieron col enfotu de compartir la cultura tradicional y, principalmente, el folclor musical y baillable astrurianu con xente d’otros países,  y, al revés, traer a Asturies manifestaciones culturales y bailles diferentes de los nuestros.

Na edición de 2018, pa los XI Alcuentros, hai dos feches y dos escenarios: el vienres 9 de payares a les siete y media de la tarde, nel centru de L’Arena, en Xixón, Xosé Antón Ambás va dar una charra sobre «Arrezos, fórmules y esconxuros na tradición asturiana». El sábadu, nes instalaciones del Muséu del Pueblu d’Asturies, la convidada d’esti añu –que ye Reyes León, de Sevilla–, va esponer na charra «La Raíz Popular del Flamenco» la so visión de la tradición flamenca en comparanza col flamencu académicu a partir de les doce la mañana y, de tarde, va poner un taller abiertu al públicu xeneral pa deprender a la manera más tradicional esti folclor que, dende’l norte, munches veces s’entiende como artificial y espectacularizáu. Estes actividaes son de baldre y abiertes a la participación de tol mundu.

Xosé Antón Fernández ‘Ambás’.
Xosé Antón Fernández ‘Ambás’.

El protagonista de la charra del vienres ye Xosé Ambás, ún de los meyores estudiosos y divulgadores que tien la cultura asturiana dientro y fuera’l país, los sos conocimientos van muncho más allá de lo que ye’l folclor musical –del que tien una conocencia fonda–, y llega a otres estayes como toponimia y zoonimia, xuegos y bolos tradicionales, lleendes o ritos estremaos.

Pa esta edición de los Alcuentros de Vezos Astures, el taller de baille va valir pa enseñar n’Asturies un flamencu popular, ensin academicismos, virtuosismos nin artificios. Un flamencu afitáu na naturalidá, de toes y toos y pa toes y toos. Nes últimes décades, la industrialización del flamencu fixo que’l so raigañu popular pasara pa un segundu planu. La verdá ye que, nel sur d’España, conviven el flamencu profesional y el flamencu popular. En munches cases, barrios, pueblos y ciudades, el flamencu sigue presentándose como elementu de sociabilidá. Hai un flamencu nos teatros y otru de tolos díes (una madre aña’l so fíu cantándo-y una añada flamenca, una amiga cánta-y a una novia una «alboreá» nel día la boda, unos amigos echen una «patá por bulerías» nun bar, una familia canta villancicos flamencos con una zambomba en Navidá…).

La persona que vien a dar el taller ye Reyes León, titulada en danza española y llicenciada en xeografía. Ella decide especializase en flamencu y aprende con bailladores del altor de Manolo Marín, José Galván o Eva Yerbabuena. Fai’l so doctoráu «El Flamenco, un acercamiento multidisciplinar a su estudio» nel Departamentu d’Antropoloxía de la Universidá de Sevilla. Nel añu 2004 entama la so compañía de flamencu y percuerre más de cien teatros en países como Alemania, Xapón, Holanda o Italia. Dirixe la Escuela de Danza «La Castañuela» dende va 19 años, onde, amás, pon clases de baille flamencu.

En Xixón, a Eva va acompañala Alberto Rodríguez, que tamién ye sevillanu y qu’empezó a tocar la guitarra a los 8 años. Entemez formación autodidacta con clases impartíes por maestros como Moraito Chico, Niño de Pura, Eduardo Rebollar y Antonio Márquez. Per otru llau, estudia guitarra clásica nel conservatoriu superior de Sevilla. Na estaya d’acompañamientu, destaca el so llabor na Compañía de Reyes León, onde lleva la dirección musical y composición flamenca. Amás de andar per abondes peñes flamenques y teatros, trabayó con munchos cantaores y bailladores.

Como tolos años, el ramu a esta xornada va ponese nuna espicha onde se van xuntar les tradiciones y les músiques del norte y del sur de la península Ibérica, y onde nunca falten especialistes en folclore de Zamora, Llión, Cantabria, Galicia, Castiella, Aragón, etc. Pa la espicha hai que s’apuntar primero.

Be the first to comment

Leave a Reply

Tu dirección de correo no será publicada.


*