Les rellaciones d’Asturies con otros países atlánticos na antigüedá va ser la materia d’estudiu nel seminariu de la Fundación Belenos

Fotografía: Daniel Cueli.
Fotografía: Daniel Cueli.

El XIX Seminariu d’Estudios Asturianos qu’entama la Fundación Belenos va facese, como siempre, en La Puela (Ayande), los díes 17 y 18 de payares. Anguaño’l títulu ye «Al otru llau de la mar: Asturies y les rellaciones atlántiques na dómina antigua»

El sábadu, el primeru en falar va ser Jorge Camino Mayor, cola charra «Les conexones atlántiques na Prehistoria recién d’Asturies» que va valir pa contestualizar un poco esta edición del seminariu. Jorge Camino Mayor (Avilés, 1960) ye llicenciáu en Xeografía y Historia y arqueólogu dependiente del Muséu Arqueolóxicu d’Asturies. Participó nun cientu escavaciones –quiciabes la más destacada sía la de La Carisa, en Ḷḷena–, coordinó dellos congresos –ún de los últimos foi’l I Alcuentru Arqueolóxicu «Les guerres astur-cántabres», que se fixo en Xixón nel 2014– y tien un carráu de trabayos espublizaos, munchos d’ellos na revista Asturies, memoria encesa d’un país, qu’edita la Fundación Belenos y de la que ye collaborador dende’l so entamu.

Pa la Fundación Belenos, ensin quita-y méritu a naide, el nome principal de los que van tar nesta edición del Seminariu d’Estudios Asturianos ye Fernando Alonso Romero (A Coruña, Galiza, 1944) qu’estudió Filosofía y Lletres na Universidá de Salamanca, onde se llicenció en Llingües Modernes. Anguaño ocupa’l cargu de caderalgu d’Historia y Cultura de los Países de Fala Inglesa na Facultá de Filoloxía de la Universidá de Santiago de Compostela. En 1974 anició’l Grupu d’Arqueoloxía Náutica Esperimental, col que construyó dos embarcaciones de cueru asemeyaes a les que s’usaben na Prehistoria pa navegar pel Atlánticu –proyeutu que recibió dellos premios– y en 1977 foi’l creador de la Sala do Mar del Museo do Pobo Galego. Amás de too esto, pue dicise d’él que ye ún de los mayores espertos en cultura celta qu’hai nel Estáu español. La conferencia que va dar titúlase «Les embarcaciones y navegaciones nel mundu celta de la Edá Antigua a l’Alta Edá Media».

Zarren les intervenciones del sábadu pela mañana Iván Muñiz López y Alejandro García Álvarez, codirectores de les escavaciones nel Castiellu Gauzón y que, precisamente, van dar la charra «El Castiellu de Gauzón. Una fortaleza medieval nel comerciu del Arcu Atlánticu». Les sos vides académica y profesional son bastante asemeyaes. Asina, Iván Muñiz ye llicenciáu en Xeografía y Hestoria y arqueólogu especialista na Alta Edá Media asturiana. Pertenez al Grupu d’Investigación n’Arqueoloxía Medieval de la Universidá d’Uviéu y ye Director Cultural del Muséu de la Mina d’Arnáu. Pon clas na UNED y nel cursu d’espertu en Xestión y Conservación de Bienes Arqueolóxicos de la Universidá d’Uviéu. De la mesma manera, Alejandro García Álvarez tamién ye llicenciáu en Xeografía y Hestoria y, amás, doctor n’Arqueoloxía Medieval. Comparte con Iván la pertenencia al Grupu d’Investigación n’Arqueoloxía Medieval y tamién punxo clas nel cursu d’espertu en Xestión y Conservación de Bienes Arqueolóxicos. Anguaño ye profesor asociáu d’Arqueoloxía na Universidá d’Uvieú. La presencia d’entrambos los dos en La Puela ye otra de les razones poderoses pa nun faltar al XIX Seminariu d’Estudios Asturianos.

Pa de tarde, ta programada la intervención de Cristobo de Milio Carrín, etnógrafu y miembru de la Fundación Belenos, que va dar una chara que se titula «Motivos celtes nel folclor asturianu: otra preba del venceyu atlánticu». Detrás va llega-y el turnu a Iván Huerga Antuña, Filólogu y Profesor, que va dar la charra titulada «Celtes de nenyuri y perdayuri. Un resume de la teoría atlantista y del estáu actual de la cuestión». Depués de la cena, nel Café Centro, va facese un filandón con música del país.

Pal domingu va ponese un audiovisual y va facese un conceyu abiertu de los ponentes y miembros de la Fundación Belenos, enantes de la hora comer. Les inscripciones pa dir a esti seminariu puen facese hasta’l día 14 de payares.

Be the first to comment

Leave a Reply

Tu dirección de correo no será publicada.


*