La videocreación ‘Neocolonialismo’ denuncia l’abusu de les empreses españoles nel «doráu del aire» mexicanu

neocolonialismu

Nel istmu de Tehuantepec (Méxicu), la sociedá capitalista convirtió la fuerza del aire en mercancía y nun mediu pa la esplotación y espropiación de les tierres. La construcción d’un proyectu d’enerxía eólico grandísimu creó nesa rexón dellos trabayos temporales, ye verdá, pero les consecuencies son graves pa la población. La manera de vivir y la convivencia de les comunidaes cambió pa siempre, y dase una división de la sociedá que ta polarizao ente los que ven los efectos negativos que lleva la construcción de los parques con molinos d’aire y los que nun-yos da más o nun los ven.

Nesti requexu del sur del estáu de d’Oaxaca, gracies al discursu de la enerxía qu’esparden empreses españoles la mayoría (Iberdrola, Gas Natural Fenosa, Acciona, Gamesa, EDF Energies Nouvelles, y otres cuantes) xustifícase’l cambiu radical de la vida comunitaria bini’zaa (zapoteca) y ikoots (huave). El proyectu Neocolonialismo, consistió en facer una intervención que ye una escultura de lluces nún los campos eólicos d’Unión Hidalgo, y tamién una grabación audiovisual qu’enseña la realidá d’esti megaproyectu: l’orde colonial col que coexistimos y los efectos pa los pueblos orixinarios que resisten al espoliu y les violaciones de derechos humanos continues.

Beatriz Millón ye la autora de Neocolonialismo. Ye artista visual y investigadora, y nel trabayu d’ella analiza les rellaciones del ser humanu col entornu au vive. Millón tien la mira puesta pa enseñar los problemes del mediuambiente que vienen del modelu de rellación, producción y consumu que gastamos. Pa crear les obres usa llinguaxes diferentes y estratexes distintes cola fin d’analizar la falta d’estabilidá del sistema ecolóxicu. Nel videu, los vecinos denuncien los problemes que tienen de fractura social, de perda de derechos, de ruíos y de contaminación.

 

Be the first to comment

Leave a Reply

Tu dirección de correo no será publicada.


*